ماكرون: پێدڤییه ره‌وشا شنگالێ بهێته ئاساییكرن
سەرۆکێ فەرەنسا ل ده‌مێ سەردانێ بۆ مزگەفتا نووری ل مویسل راگەهاند، هێرشێن داعشێ دژی هەمى پێکهاتەیێن ئایینی بوو. هەروه‌سا دبێژیت، دگەل کریستیان، ئێزدییان ئاخفتییه و سەردانا مزگەفتا نوری کو مزگه‌فتا سووننەیانه و مزگەفته‌كا شیعى ل بەغدا کرییه.
ئیمانوێل ماکرۆن،سەرۆکێ فەرەنسا ئەڤرۆ 21 سەردانا مویسلێ کر و ل به‌ر مزگەفتا نووری بۆ رۆژنامەڤانان ئاخفت، و راگه‌هاند، “پەیاما من ئەوه کو دگەل حکومەتا هەرێما کوردستانێ و حکومەتا عێراقێ کاربکەین بۆ شەرکرنێ ل گەل تیرۆرێ، چونکى ئەگەر ئاشتی و سەقامگیری نەبیت چ ئایینه‌ك نه‌شێت دگەل تیرۆرێ بژیت.”
هەروسا سەرۆکێ فەرەنسا ده‌رباره‌یى رۆلێ مزگەفت و کەنیسان دبێژیت، مزگەفت و کەنیسە جهێ زانست و فێرکرنێ بوون و هه‌ڤكارییا خەلكى کرییه، “دڤێت کاربکەین بۆ زیندیكرنا ئه‌وان شیانان”.
د پشكه‌كا دى یا ئاخفتنێن خوه دا سه‌رۆكێ فه‌ره‌نسا راگه‌هاند، سه‌قامگیرى و ئاشتى دێ یا به‌رده‌وام بیت، ئه‌گه‌ر هاتوو مه ره‌گ و ریشه‌یێن ئه‌وا رووداین چاره‌سه‌ربكه‌ین، ئه‌و ژى ژ ئه‌گه‌رێ نه‌بوونا هیڤى و كێمیا ده‌رفه‌تان و كێمیا فێركرن و زانستى رویدا.
