کارڤەدانێت ٣١ ێ ئابێ د سوشیال میدیایێدا
دەنگێ بەهدینان
یادا ٣١ێ ئابا ٢٠٢١ ب شێوەک جودا هات بیرئانین ، مەکتەبا سیاسیا ئێکەتیێ د پەرەگرافەکیدا پەیامەک بەڵاڤ کر و بێی کو دان ب خەلەتیا خودا بینیت و بێژیت مە دگەل پاسدارا ئێرشی سەر پارتیا دیموکراتا کوردستانێ کر ب ئارمانجا ژناڤ برنا ئەڤێ حزبا شوڕەشگێڕ ، چەند تومەت و تەشهیر و پڕوپاگەندە تێدا بەڵاڤ کرن.
د بەرامبەردا مەکتەبا سیاسیا پارتیا دیموکرات ب شەش وشا بەرسڤا وان دا و گوت ” ٣١ێ ئابا پیرووز ( دفع الافسد بالفاسد )بوو ” ، ئەڤەژی بو ژجهێ گەنگەشێ و دەنگڤەدانەک هەری مەزن دیف خوڕا ئینا د سوشیال میدیایێدا ، نوژدار هەرکی چالاکڤانێ سوشیال میدیای لسەر ئەڤێ بەرسڤێ دبێژیت ” ئێکەتیێ بخو مەژی دسەریدا نەمایە ، پارتی ب شەش وشان وێرانتر کر ” ، هەروەسا ڕەڤەند سلێڤانەیی دبێژیت ” پارتی ل گور حەجمێ ئێکەتیێ بەرسڤ دا و ژێڕا گوت دڤێت تو حەجمێ خو بزانی و پارتی نە بخو سەپاندن دگەل تە کاردکەت ، بەلکو تو دگەل خو کریە نیڤ ب نیڤ ، ئەگەر خو سەپاندن هەبت ، شەش پیت بوتە بەسن “.
هەروەسا کامی کەمال ڕوژنامەڤان و چالاکڤانێ سوشیال میدیای ل سەر ڕوژا ٣١ێ ئابێ دبێژیت ” ئێەکتی حزبەکا بێ پلان و بێ زاکیرەیە ، ئەگەر نە دا کارەکی کەت کو هەرچ دیروک و و دیروک نڤیس هەیە ل فەرهەنگا کوردیدا دا ژی بەت و ڕاگریت ، هەتا خو ژ هەمی ئەڤان لاپەڕێت ڕەشێت کو بخیانەتا نیشتیمانی پڕ کرین ڕزگار کەت “.
هەروەسا سەروان وەڵات ژێری کو ئەوژی چالاکڤانەکێ دیارێ سوشیال میدیایە دبێژیت ” دیروکا ٣١ێ ئابێ یادیارە ، پێتڤی ب گەنگەشە کرنێ ناکەت ، ژبەر کو ئەگەر بەرێ بنیاتێ بەرەکی لڤی وەڵاتی ب جوانی هاتبیتە دانان ، سەخمەراتیا ٣١ێ ئابێ بویە “.
