قونسلێ چینێ ل هه‌رێمێ: هه‌رێما كوردستانێ وه‌كى كانیه‌كا زێرى یه بو وه‌به‌رهێنه‌ران
لى چنگ شنگ قونسولێ بازرگانى یێ چینێ د چارچوڤێ پشكداریكرنێ د دیدارا ئابوورى دا دووپاتى ل وێ چه‌ندێ كر: كو هه‌رێما كوردستانێ پشكه‌ك بوویه ژ رێكا دیروكى یا بازرگانى یا ئاوریشمى ، هه‌روه‌سا راگه‌هاند عیراق و هه‌رێما كوردستانێ پشكه‌كن ژ ده‌ستپێشخه‌ریا ئێك پشته‌ڤانى و ئێك رێكا چینى كو ب رێكا ئاوریشمى یا نوى هاتیه نیاسین.
سالانه نێزیكى دوو ملیار و 500 ملیون دولار كه‌ل و په‌ل ژ چینێ دهێنه هه‌رێما كوردستانىێ. هه‌روه‌سا چینێ لڤێ دوماهیێ وه‌به‌رهێنانێن خو ل هه‌رێما كوردستانێ زێده‌كرینه، دیارترین ژى وه‌به‌رهێنانا پێنج ملیار دولارى یا وى وه‌لاتى یه ل هه‌ولێرێ كو كومه‌لگه‌هه‌كا بازرگانى و ئاكنجیبوون و گه‌شت و گوزاریه.
قونسولێ بازرگانى یێ چینێ ل هه‌رێما كوردستانێ ئاشكرا ژى كر، د شه‌ش هه‌یڤێن ده‌ستپێكا ئه‌ڤ ساله دا قه‌بارێ بازرگانى دناڤبه‌را چین و عیراقێ گه‌هشتیه 16.38 ملیار دولارا، هنارتنا كه‌ل و په‌لان ژ عیراقێ بو چینێ 4.93 ملیار دولاره و بو عیراقێ 11.45 ملیار دولاره. گوت ژى: هه‌رێما كوردستانێ وه‌كو كانیه‌كا زێرى یه بو وه‌به‌رهێنه‌رێن بیانى.
