سه‌روك بارزانی: داخوازێ ژ كادر و ئه‌ندام و لایه‌نگرێن پارتی دكه‌م ڤێجارێ ژی پارتی بكه‌نه حزبا ژمارە ئێك
سه‌روك بارزانی: داخوازێ ژ كادر و ئه‌ندام و لایه‌نگرێن پارتی دكه‌م ڤێجارێ ژی پارتی بكه‌نه حزبا ژمارە ئێك
ب به‌رهه‌ڤبوونا سه‌رۆك مه‌سعود بارزانی كه‌رنه‌ڤالێ دانه‌نیاسینا به‌ربژارێن پارتی بۆ هه‌لبژارتنێن جڤاتا نوونه‌رێن ئیراقێ ل هه‌ولێرێ ب رێڤه‌چوو.
سه‌رۆك بارزانی د كه‌رنه‌ڤالێ دا گۆتاره‌ك پێشكێشكر و ئه‌ڤه ده‌قێ وێ چیه..
د ڤێ رۆژا پیرۆز دا رۆژا 11 ئه‌یلوولێ كو رۆژه‌كا ئێكجار پیرۆزه، ئه‌م ل ڤێرێ كۆمبووین بۆ وێ چه‌ندێ هه‌وا هه‌لبژارتنان بۆ به‌ربژارێن مه رابگه‌هینین، شۆره‌شا ئه‌یلوولێ، نه‌كو تنێ شۆره‌شه‌كا چه‌كداری بوو، به‌لكو شۆره‌شه‌كا سیاسی و جڤاكی بوو، شۆره‌شا دروستكرنا تاكێ كورد بوو، شۆره‌شا دروستكرنا باوه‌ریێ بوو دناڤ ملله‌ته‌كی دا كو بزانیت خودانێ دۆزه‌كێ یه و چاوان به‌رگریێ ژ دۆزا خوه بكه‌ت و پلانێن دژمنان ژناڤ ببه‌ت.
شۆره‌شا ئه‌یلوولێ ببوو په‌ناگه‌هه‌ك بۆ هه‌موو خه‌باتكه‌ر و پێكهاتێن خه‌لكێ ئیراقێ، سه‌ركردایه‌تیا شۆره‌شێ حیكمه‌ته‌كا مه‌زن هه‌بوو، كو درووشمێ سه‌ره‌كی یێ وێ (دیموكراسی بۆ ئیراقێ و ئۆتۆنۆمی بۆ كوردستانێ)، شۆره‌شا ئه‌یلوولێ بناغێ هه‌موو بزاڤا رزگاریخوازیه ل پشتی سالا 1961 و هه‌تا ئه‌ڤرۆ و بۆ پاشه‌رۆژێ ژی، شۆره‌شا ئه‌یلوولێ، قوتابخانه‌كا مه‌زنه، قه‌هره‌مانێن گه‌له‌ك مه‌زن پێگه‌هاندن و ده‌ستكه‌فتێن مه‌زن ژی بۆ گه‌لێ كوردستانێ ب ده‌ستڤه‌ئینان، ژ هه‌موویان ژی مه‌زنتر ئه‌وبوو ملله‌ته‌ك هشیاركر و بوو ملله‌ته‌كێ خودان باوه‌ری ب خوه، كو ئه‌و ژ هه‌موو تشته‌كی مه‌زنتره.
هه‌یڤه‌ك یا مای بۆ هه‌لبژارتنێن په‌رله‌مانێ فیدرالی، هه‌رچه‌نده مه گه‌له‌ك تێبینی ل سه‌ر قانوونا هه‌لبژارتنان و به‌لاڤكرنا كورسیێن پارێزگه‌هان هه‌بوون، كو هیچ دادپه‌روه‌ریه‌ك و ئینسافه‌ك تێدا نینه و ل سه‌ر هیچ بنه‌مایه‌كێ راست ژی نینه، چونكه سه‌رژمێری نه‌هاتیه كرن، به‌لێ بۆ به‌رژه‌وه‌ندیا گشتی و بۆ وێ چه‌ندێ سه‌نگا پارتی بپارێزین مه بریاردا پشكدار ببین، ب هه‌موو كێماسیێن هه‌لبژارتنان دا هه‌ین.
داخوازیا مه و داخوازیا هه‌موو خه‌لكێ ئیراقێ ئه‌وه هه‌موو لایه‌ن كو دێ پشكدار بن د هه‌لبژارتنان دا ئه‌وه پێدڤیه هه‌لبژارتنێن پاقژ بن و سه‌خته‌كاری تێدا نه‌بیت، ئه‌و داخوازا نه‌ته‌وێن ئێكگرتی و جڤاكێ نێڤده‌وله‌تی ژی یه، مه هه‌موویان دووپات كریه كو ب هه‌موو شیانێن خوه بزاڤێ بكه‌ین كو هه‌لبژارتنێن پاقژ بن و هیڤیدارین د سه‌ركه‌فتی بین د وێ چه‌ندێ دا، سۆز ژی هاتیه دان كو چاڤدێریه‌كا توند بهێته كرن، بۆ وێ ئێكێ سه‌خته‌كاری نه‌هێته كرن، هیڤیدارین د سه‌ركه‌فتی بن د ئه‌ركێن خوه دا.
هه‌ڤالان.. بێگومان هه‌لبژارتن راستترین و باشترین رێیه بۆ هه‌ر گوهۆرینه‌كا د ده‌ستهه‌لاتێ دا بهێته كرن، پارتی ب خوه خودان پێشنیازا هه‌لبژراتنایه، ل بیرا هه‌وه هه‌موویانه ل نه‌ورۆا سالا 1991 ل ده‌مێ سه‌رهلدانا مه‌زن ل باژێرێ كۆیه، ئه‌و داخوازیه مه ئاراسته‌ی هه‌موو جیهانێ و گه‌لێ كوردستانێ كر، كو ئه‌م دخوازین هه‌لبژارتنان ئه‌نجام بده‌ین، ژ شه‌رعیه‌تا شۆره‌شگێری بچین بۆ شه‌رعیه‌تا دستووری و قانوونی ب رێیا هه‌لبژارتنان، ئه‌و نه كه‌سێ سه‌پاندبوو ل سه‌ر مه، باوه‌ر ژی ناكه‌م ل وی ده‌می كه‌سێ هزر د وێ چه‌ندێ دا كربیت، به‌لێ ئه‌و بۆ مه وه‌كو پارتی، پرسه‌كا مه‌بده‌ئی و قه‌ناعه‌ته، نوكه ژی ئه‌م دبێژین هه‌ر گوهۆرینه‌ك د ده‌ستهه‌لاتێ دا ب رێیا هه‌لبژارتنان ب رێیا دیموكراسی بهێته كرن، به‌لێ ب كوده‌تایێ گوهۆرین ناهێته كرن.
ل هه‌لبژارتنێن بۆری، پارتی نه‌كو ل سه‌ر ئاستێ هه‌رێما كوردستانێ، به‌لكو ل سه‌ر ئاستێ هه‌موو ئیراقێ بوو حزبا هژمار ئێك، بێگومان ئه‌ڤه ئه‌نجامێ زه‌حمه‌تا سه‌ركردایه‌تی و ئه‌ندام ولایه‌نگرێن پارتی بوو، به‌لێ ل بیرا هه‌وه نه‌چیت، پاداشتا گه‌لێ كوردستانێ بوو بۆ پارتی، بۆ هه‌لویستێن نه‌گۆر و نه‌ته‌وی یین راست و دروست یێن پارتی.
هیڤیدارم ڤێجارێ ژی پارتی هه‌ر ب سه‌ركه‌فتی د ڤان هه‌لبژارتنان دا ژی ده‌ربچیت و هه‌ر بمینیت حزبا هژمار ئێك، مافێ هه‌ر حزبه‌كێ یه ژی بزاڤێ بكه‌ت حزبا ئێكێ بیت و ئه‌و مافه بێگومان یێ پارتی یه ژی، بۆ وێ چه‌ندێ ئه‌م وێ سه‌ركه‌فتنێ و ده‌ستكه‌فتان بپارێزین، داخواز دكه‌م هه‌موو رێكخستنێن پارتی ب جۆش و خرۆشه‌كا نوو ڤه بهێنه مه‌یدانێ، داخوازێ ژ هه‌موو كادر و ئه‌ندام و لایه‌نگرێن پارتی دكه‌م، هه‌موو دلسۆزان پشكدار ببن د هه‌لبژارتنان دا، چونكه هه‌لبژارتنێن چاره‌نڤیسسازن.
داخواز ژ رێكخستێن پارتی دكه‌م د پێگیر بن ب رێنمایێن لژنا بلند یا هه‌لبژارتنان و ته‌ناهیێ بپارێزن و خوه دوور بگرن ژ ناڤرزاندنێ.
هه‌ڤالێن پارتی.. دبیت هه‌وه گازنده هه‌بن، مافێ هه‌وه ژی یه، به‌لێ ئه‌ڤرۆ رۆژا وێ چه گازندان بده‌نه ره‌خه‌كی، گازندان هه‌لگرن بۆ پشتی هه‌لبژارتنان، مافێ هه‌وه هه‌رچ بۆ وێ چه‌ندێ بهێته كرن هه‌ر كێمه، به‌لێ نابیت گازنده ببنه ئه‌گه‌رێ وێ چه‌ندێ ده‌لیڤه بده‌ن خه‌لكی دی پارتی تووشی خودێ نه‌كه‌ت شكه‌ستنه‌كێ ببیت، یان نسكۆیه‌كێ ببیت، ژ به‌ر وێ چه‌ندێ د دلگرانن، ژ به‌ر ڤی به‌رپرسێ و یێ دی، ئه‌ڤه هه‌می مافێ هه‌وه‌یه، به‌لێ د ڤان هه‌لبژارتنان دا، دڤێت پارتا خوه رابگرن و سه‌ر بێخن و نه‌هێلن هیچ كێماسیه‌ك بهێته پێش پارتیا هه‌وه.
ل ناڤخوه‌یا مه ل كوردستانێ ژی، دخوازم هه‌موو لایه‌ك ب خوه‌دا بچیت ل شوینا بزاڤا هه‌ڤدو شكاندنێ و هه‌دوو ژناڤبرنێ بده‌ن، هزر ل وێ چه‌ندێ بكه‌ن چاوان پێكڤه كار بكه‌ین، بۆ نه‌ته‌وێ خوه و خه‌باتێ بكه‌ین چاوان ل به‌رامبه‌ر ڤان هه‌موو ته‌حه‌دیاتێن ل به‌راهیا مه ب راوه‌ستین، مه پێخوه‌شه ل به‌غدا ژی چاره‌سه‌ریا هه‌موو گرفتان بهێته كرن.
پرسا بودجه‌ی.. ئه‌ڤه ب راستی یاریه‌كا گه‌له‌ك ئه‌رزانه، بودجه مافێ هه‌موو خه‌لكی یه، كێشا گه‌لێ كوردستانێ تنێ مووچه نینه، مووچه كێشه‌كه ژ كێشان، ئه‌م خودان دۆزه‌كا سیاسی نه، ئه‌م نه‌ته‌وه‌كین، كێشا هه‌ره سه‌ره‌كی پرسا هه‌ڤپشكیێ یه، هه‌ڤپشكی نه‌هێلایه، ژ به‌ر وێ چه‌ندێ پێدڤیه ئه‌م بچینه دكووراتیا كێشان دا، ئه‌و ژی دێ ب وێ چه‌ندێ هێته چاره‌سه‌ركرن كو دڤێت ب تێگه‌هشتن و هه‌ڤپشكی هزر د چاره‌سه‌ریا جدی بهێته كرن دوور ژ سۆز و دامارگێریێ.
هیڤیدارم ژ نوكه و وێڤه سه‌رۆكایه‌تیا هه‌رێمێ، سه‌رۆكایه‌تیا جڤاتا وه‌زیران، جڤاتا وه‌یزران، په‌رله‌مان زێده‌تر هزر د وێ چه‌ندێ دا بكه‌ن كو خزمه‌تگوزاریێن باشتر پێشكێشی خه‌لكێ كوردستانێ بهێنه كرن، ژ هه‌موویان گرنگتر، گرنگیه‌كا پتر ب په‌روه‌ردێ بهێته دان.
