دەنگێ تە وژدانا تەیە
دەنگێ تە وژدانا تەیە
زەنون سلێڤانەی ـ زاخو
دەنگدان پروسەكا دیموكراسیە و ھاولاتی برێكا دەنگدانێ دشێیت بەشداری پروسا سیاسی بیت و ئەو كەسێن دەنگێ خوە دەتێ، ببنە نوونەرێن وی چ ل ئەنجومەنێ نوینەران بن یان جڤاتا پارێزگەھان و دڤێت ئەڤ پروسەیە ب رەنگەكێ دیموكراسیییانە بیت و ھیچ فشارەك ل سەر دەنگدەری نەبیت و دیسان دڤێت دەنگێ وی یێ پاراستی بیت و ھیچ دەنگەكێ سەختە نەچیتە دناڤ سندوقێن دەنگدانێ دا و دیسان دەنگێ وی نەھێتە پوچكرن.
ئەڤا سەری دڤێت ل ھەمی پروسەكا ھەلبژارتنان بھێتە كرن، نابیت كەسەك ھەست بكەت دێ دەنگێ وی ب ھەروە چیت و یان دەنگەكێ دی پێش دەنگێ ویڤە بچیتە ناڤ سندوقێ و كەسەكێ نە ھەژی، ب باوەرییا وی كو ئەو كەس نەشێت نوونەراتییا وی بكەت بھێتە ھەلبژارتن.
وەك دیار ژی، هەرێما کوردستانێ ژی د ماوەی دڤان سیھ سالێن دەربازبوویێ دا چەندین هەلبژارتنا هاتنە ئەنجامدان و پشکداریا قەوارێن سیاسی برێکا خرڤەکرنا دەنگێن وەلاتیان ھاتینە ئەنجامدان و ھەر ژ دامەزراندنا پەرلەمان و حکومەتێ و مەبەست ژێ، ھاولاتیێ كورد ل ھەرێما كوردستانێ وەك ھەمی وەلاتێن جیھانێ ئەڤ پروسا دیموكراسیێ دناڤ را دەرباز ببیت.
پێدڤیە دەنگدەر ل دەنگێ خوە ھشیار بیت و بزانیت كی دێ شێت نوونەراتییا دەنگێ وی كەت و راستی شێت ل ئەنجومەنێ نوونەرێن عیراقێ شەری ژبۆ دەستكەفتێن كوردان كەت و دڤێت بەشدارییا وی ل سەر وی ئاستی بیت، كو دەنگێ وی بتنێ بەسە بۆ دروستكرنا گوھورینێ و دەنگێ وی دشێت چاكسازیێن دروست ئەنجامبدەت و كێشێن ھاولاتیێ كورد كێم بكەت، بوویە نابیت دەنگێ وی بھێتە فروتن یان بو كەسەكێ نەھەژی بچیت.
