خزمەت کرنا خەلکێ ئاکرێ یا بەردەوامە پڕوژە هاتن ڕاگەهاندن

پرۆژێ‌ ستراتیژیێ‌ ئاڤا ئاكرێ‌ به‌ری چه‌ند سالان كار ل سه‌ر هاتبوو كرن و قه‌یرانا دارایی یا ب سه‌ر هه‌رێما كوردستانێ‌ ژی دا هاتی كارتێكرن ل سه‌ر تمام نه‌بوونا پرۆژه‌ی هه‌بوو، له‌و هه‌تا نوكه‌ نه‌هاتیه‌ تمامكرن، ب مه‌ره‌ما تمامكرنا پرۆژێ‌ ئاڤا ئاكرێ‌، حوكمه‌تا هه‌رێما كوردستانێ‌ 15 ملیار دینار بۆ تمامكرنا وی مه‌زاختن.

ل سه‌ر بودجا وه‌به‌رهێنانا وه‌زاره‌تا باژێرڤانی و گه‌شت و گۆزارێ یا حوكمه‌تا هه‌رێما كوردستانێ بڕیار هاته‌دان 15 ملیار و 140 ملیۆن دینار بۆ تمامكرنا پرۆژێ ئاڤا ئاكرێ بهێنه‌ ته‌رخانكرن، ئه‌ڤه‌ ژی د ده‌مه‌كی دایه‌، نوكه‌ ب گۆژمێ دو ترلیۆن و 887 ملیار دیناران 297 پرۆژێن ئاڤێ ل هه‌رێما كوردستانێ دهێنه‌ بجهئینان.

ته‌رخانكرنا وان 15 ملیار دیناران ب مه‌ره‌ما خزمه‌تكرنا زێده‌ترا وه‌لاتیێن ئاكرێ و گه‌شه‌پێدانا كه‌رتێ‌ ئاڤێ یه‌ ل وی سنووری، ئه‌و گۆژمێ‌ پاره‌ی ب شێوێ نه‌ختینه‌ و ب قووناغ ب قووناغ ل سه‌ر بودجا وه‌به‌رهێنانا وه‌زاره‌تا باژێرڤانی و گه‌شت و گۆزارێ دێ هێته‌ مه‌زاختن.

ملله‌ت عسمه‌ت، سكرتێرێ‌ رۆژنامه‌ڤانی یێ‌ پارێزگارێ‌ دهۆكێ‌بو میدیایان دیارکر کو ب مه‌ره‌ما دانانا به‌رێ‌ بنیاتی بۆ هه‌ژماره‌كا پرۆژان و راگه‌هاندنا هه‌ژماره‌كا پرۆژێن نوو ل قه‌زا ئاكرێ‌، ئه‌ڤرۆ 29/9/2021 دكتۆر عه‌لی ته‌ته‌ر، پارێزگارێ‌ دهۆكێ‌ دێ‌ سه‌ره‌دانا وێ‌ قه‌زایێ‌ كه‌ت.

ملله‌ت عسمه‌ت گوتژی”د ڤان دو سالان دا 269 پرۆژه‌ ل پارێزگه‌ها دهۆكێ ب گۆژمێ‌ 570 ملیار دیناران ژ لایێ‌ حوكمه‌تا هه‌رێما كوردستانێ‌ ڤه‌ هاتینه‌ بجهئینان”.