چەندین پڕوژێن خزمەت گوزاری ل دهوکێ هاتن ڕاگەهاندن

ب مه‌ره‌ما دووڤچوونا پرۆژێن خزمه‌تگۆزاری ئه‌وێن ل سه‌نته‌رێ‌ ده‌ڤه‌رداریا دهۆكێ‌ و ناوچه‌داریێن زاویته‌ و مانگێشكێ‌ و سه‌رسنكێ‌ دهێنه‌ ئه‌نجامدان، دوهی 5/10/2021 د. عه‌لی ته‌ته‌ر،  پارێزگارێ‌ دهوكێ‌  و ب به‌رهه‌ڤبوونا جه‌هوه‌ر عه‌لی، ده‌ڤه‌ردارێ‌ دهۆكێ‌ و رێڤه‌به‌رێن گشتی یێن چه‌ند فه‌رمانگه‌هێن میری و رێڤه‌به‌رێن ناوچه‌داریێن زاویته‌ و مانگێشكێ‌ به‌رێ‌ بنیاتی بۆ هه‌ژماره‌كا پرۆژان هاته‌ دانان.

ئه‌و پرۆژێن خزمه‌تگۆزاری یێن پارێزگارێ‌ دهۆكێ‌ به‌رێ‌ بنیاتی بۆ دانای، د بیاڤێن ئاڤێ‌ و تۆرێن ئاڤێ‌ و ڤه‌كرن و قێركرن و كۆنكریتكرنا رێیێن تاخێن سه‌نته‌رێ‌ ده‌ڤه‌رداریا دهۆكێ‌ و ناوچه‌داریێن زاویته‌ و مانگێشكێ‌ و سه‌رسنكێ‌ و كۆمه‌لگه‌ه و گوندێن سه‌ر ب وان ناوچه‌داریان ڤه‌ نه‌.

دیسا پارێزگارێ‌ دهۆكێ‌ و یێن د گه‌ل دا سه‌را ناوچه‌داریا مانگێشكێ‌ دا و ژلایێ‌ رێڤه‌به‌رێ‌ ناوچه‌داریێ‌ و فه‌رمانبه‌رێن وێ‌ پێشوازی لێ‌ هاته‌ كرن، درونشتنه‌كێ دا به‌حسێ‌ ره‌وشا ده‌ڤه‌رێ‌ و پێدڤیێن خه‌لكێ‌ ناوچه‌داریێ‌ ب پرۆژێن خزمه‌تگۆزاری ب گشتی هاته‌ كرن.

د. عه‌لی ته‌ته‌ر، پارێزگارێ‌ دهۆكێ‌ ته‌كه‌ز كر كو به‌رده‌وام پرۆژێن خزمه‌تگۆزاری یێن فه‌ر ب یه‌كسانی ل هه‌موو ده‌ڤه‌رداریا دێ‌ هێنه‌ ئه‌نجامدان و خواست كو هه‌موو كار و خزمه‌ت ل دووڤ رێنما و یاسایێن حوكمه‌تا هه‌رێمێ‌ بهێنه‌ گه‌هاندن و ژینگه‌ه و داراستانا ده‌ڤه‌رێ‌ باش بهێته‌ پاراستن.

پاشی د كۆنگره‌كێ‌ رۆژنامه‌ڤانی دا پارێزگارێ‌ دهۆكێ‌ گوت: “دوهی د چارچوڤێ‌ بودجا گه‌شه‌پێدانا پارێزگه‌هێ‌ دا مه‌ به‌رێ‌ بنیاتی بۆ هه‌ژماره‌كا پرۆژان دانا، هنده‌ك پرۆژه‌ ب دووماهی هاتینه‌ و هنده‌ك ژی د وارێ‌ بجهئینانێ‌ دانه‌ و كار ل سه‌ر دهێته‌ كرن، نوكه‌ ب گوژمێ‌ پتر ژ 95 ملیار دیناران پرۆژه‌ ل سنوورێ‌ ده‌ڤه‌رداریا دهۆكێ‌ د بیاڤێ‌ رێ‌ و ئاڤ و كاره‌ب و ساخله‌می په‌روه‌ردێ‌ و… هتد دا دهێنه‌ ئه‌نجامدان”.

هه‌روه‌سا ل قووناغێن بهێت ژی به‌رده‌وام پرۆژێن خزمه‌تگوزاری دێ‌ هێنه‌ ئه‌نجامدان.