هێزێن دەرچوی ل یاسای نەشێن ڕێگریێ ل زڤڕینا ئیدارا شەرعیا شەنگالێ بکەن
شتی هه‌لبژارتنان دبیت ئێدارا شه‌رعی بزڤریته شنگالێ بۆ دانانا قایمقامێ ژی دێ هه‌ماهه‌نگی د ناڤبه‌را حوكمه‌تا هه‌رێما كوردستانێ و ئیراقێ دا هه‌بیت.
عومه‌ر عه‌لی، جێگری پارێزگارێ نه‌ینه‌وا بۆ كارۆبارێن ئاواران گۆت” پێدڤیه حوكمه‌تا داهاتی یا ئیراقێ گرنگیێ ب كێشا شنگالێ بده‌ت ب تایبه‌تی ژی زڤرینا ئاواران و دابینكرنا ته‌ناهیێ و قه‌ره‌بووكرنا خه‌لكێ شنگالێ یێن ژلایێ تیرۆرستێن داعشێ ڤه ل سالا 2014ێ تووشی زیانان بووین هه‌روه‌سا كار بهێته كرن بۆ زڤرینا ئێدارا شه‌رعی بۆ شنگالێ چونكو هه‌تا ئێدارا شه‌رعی نه‌زڤریته شنگالێ ئاڤه‌دانی ده‌ست پێ ناكه‌ت هه‌روه‌سا ئاواره ژی نه‌شێن ڤه‌گه‌رن”.
جێگری پارێزگارێ نه‌ینه‌وا بۆ كارۆبارێن ئاواران گۆت ژی” دبیت حوكمه‌تا هه‌رێما كوردستانێ و ئیراقێ رێككه‌فتنێ ل سه‌ر دانانا كه‌سه‌كێ بكه‌ن بۆ پوستێ قایمقامێ شنگالێ ئه‌ز دبینم پشتی هه‌لبژارتنان دێ ئێدارا شه‌رعی زڤریته شنگالێ”.
دیاركر” نه‌زڤرینا ئێدارا شه‌رعی بۆ شنگالێ زیانه‌كا مه‌زنه ب هه‌ر شێوه‌یه‌كێ هه‌بیت، چونكو شنگال ئاڤه‌دان نابیت بێ زڤرینا ئیدارا وێ یا شه‌رعی كو ئه‌ڤه پێنچ سالن ئێدارا شه‌رعی نه‌چوویه شنگال د ئه‌نجامدا ژی پرۆژه نه‌هاتینه بجهئێنان وئاڤه‌دانی نه‌هاتیه كرن وئاواره ژی نه‌شیاینه ڤه‌گه‌رن هه‌ر ده‌مێ ئێدارا شه‌رعی زڤری شنگال، دێ بۆ ئاواران ژی باوه‌ری دروست بیت ودێ ده‌لیڤین كاركرنێ په‌ێدابن ودێ خه‌لك زڤرن”.
عومه‌ر عه‌لی، ئاشكه‌را كر” هه‌تا نوكه پتر ژ 140 هزار ئاوارێن شنگالێ دناڤ كه‌مپاندانه ل سنورێ پارێزگه‌ها دهۆكێ ژبلی ئاوارێن ژده‌رڤه‌ی كه‌مپان دژین وهه‌تا نوكه پتریا خه‌لكێ شنگالێ ئاواره‌نه وچاڤه‌رێنه پشتی هه‌لبژارتنان كێشا شنگالێ چاره‌سه‌رببیت وئێدارا وێ یا شه‌رعی بزڤریت”.
باپیر خدر حه‌جی، رێڤه‌به‌رێ باژێرڤانیا شنگالێ دبێژیت” رێژا 80% ژ شنگالێ ژلایێ تیرۆرستێن داعشێ ڤه یا هاتیه وێرانكرن وگه‌له‌ك جاران مه بزاڤ كرن بزڤرینه شنگالێ، لێ هیزێن نه‌قانوونی رێگری ل زڤرینا ئێدارا شه‌رعی دكرن و ئه‌ڤه بوویه ئه‌گه‌ر ئه‌م نه‌شێن چ پرۆژه‌یێن خزمه‌تگوزاری ل شنگالێ ئه‌نجام بده‌ین”.
گۆت ژی” ئه‌ڤه پتر ژ پێنچ سالایه ب تایبه‌تی ژی پشتی 16 ئۆكتۆبه‌را 2017ێ مه نه‌شیایه بزڤرینه شنگالێ بۆ ده‌ستپێكرنا ئاڤه‌دانیێ و گه‌هاندنا پرۆژه‌یێن خزمه‌تگوزاری و هه‌كه رێگری نه‌هاتبا كرن، نوكه پتر 40% شنگال هاتبوو ئاڤه‌دانكرن”.
د. ماجد شنگالی، به‌ربژارێ پارتی یێ سه‌ركه‌فتی ژ شنگالێ د هه‌لبژارتنێن جڤاتا نوونه‌رێن ئیراقێ دا راگه‌هاند گۆت” هێزێن نه‌قانوونی ئێدی نه‌شێن رێگریێ ل زڤرینا ئێدارا شه‌رعی بكه‌ن و بۆ وان هێز و گرۆپان ئاشكرابوو خه‌لكێ شنگالێ بتنێ پارتی دڤێت و دخوازن پارتی بزڤریته شنگالێ، هه‌كه جاره‌كا دێ گرۆپێن نه‌قانوونی رێگریێ بكه‌ن پێدڤیه حوكمه‌تا ئیراقێ بێده‌نگ نه‌بیت وب هه‌ر شێوه‌یه‌كێ هه‌بیت پێدڤیه ئه‌و گرۆپ شنگالێ چۆل بكه‌ن”.
