سکاڵا لسەر لاهور تلیاکچی هات تومارکرن
دەنگێ بەهدینان
کەس و کارێت قوربانیێت خونیشاندەرێت قەزا سەید سادق بفەرمی سکاڵا لسەر لاهور تلیاکچی تومار کر ، ڕەمەزان عەبدولکەریم بابێ ئێک ژ قوربانیا ب (( دەنگێ بەهدینان )) ڕاگەهاند ” ئەگەر ئەم بخو ل دیف مافێ خو نەچین کەسەک ناهێت مافی بومە بزڤڕینیت ، لەوما مە پێکڤە بڕیاردا کو پارێزەرەکی بگرین و سکاڵای بفەرمی لسەر تومار بکەین ، ب تایبەت دنهادا کو هەمی ئالی لسەر تاوانێت لاهور هاتینە دەنگ و دخازن بدەن دادگەهێ ، ئەم ژی وەک کەس و کارێت قوربانیان دخازین مافێ خو و خینا کوڕێت خو لڤی کەسی وەرگرین”.
هەروەسا حەمەی سۆفی مەولود برایێ قوربانیەکی دن گوت ” دەمێ چاڤ سور کرنێ یێ بوری و ل تو کەسەکی ناترسین ، لەوما مە سکاڵا تومارکر و ئیدی ناهێلین خینا زاروکێت مە ب بەلاش بچیت ، برایێ من کاسب بو ل بازاڕا سەید سادق کار دکر ، لێ ئەڤان چەتا ب زولم تەقە لێکر و شەهید کر ، ڤیدیو هەنە و لبەر دەستن ، لەوما ئەم ل مافێ خو خوش نابین”.
