بن پێ کرنا ئاڵایێ کوردستانێ کارڤەدانەک مەزن لـدیف خو ئینا

دەنگێ بەھدینان

پشتی خونیشاندانێت قوتابیان لـ دەڤەرا سلێمانیێ و دەستڤەدانا لاھور تلیاکچی و پەکەکێ لـ ئەڤان خونیشاندانادا ، ئاڵایێ کوردستانێ ژلایێ چەند تێکدەرانڤە ھاتە بن پێ کرن ، ئەڤێ چەندێ ژی دەنگڤەدانە مەزن لـ دیف خوڕا ئینا لـ سوشیال میدیای.

ھەرێم قلیاسانی چالاکڤانێ دیارێ سوشیال میدیای لـ سلێمانیێ لـ پەرێ خو یێ تایبەت لـ تورا جڤاکیا فەیسبوکێ نڤیسیە ” ئەڤە ھەمی بەرھەمێ ئیرھابا فکریە و تەڤا حزبێن بناڤ ئوپوزسیون ژێ بەرپرسیارن ، ئەڤە بەرھەمێ ٢٠٠٩ ێـیە ، ئەوێن کا دگوت ئەمێ گوھڕین تەنێ شیان کو مەژیێ گەنجان بگوھڕن ژ نیشتیمان پەروەریێ بو یاخی و خاینچێتیێ”.

ھەروەسا کەمال ئەکرەم ئێکێ دن ژ چالاکڤانێت سوشیال میدیای دبێژیت ” میدیایێت کومەلێ و پەکەکێ و لاھور تلیاکچی ھانێ گەنجان ددا بو ڤی کاری ، ئەو کەسێن کو ئاڵا بن پێ کری کادرێت کومەڵێ و پەکەکێ و کێرڤەشێنێن لاھور تلیاکچی بون”.

ھەروەسا بیرکار شڤان پارێزەر و یاسا ناس دبێژیت ” ئەگەر لـ وەڵاتەکی ، ئاڵایێ وەڵاتەکێ دن بھێت شەوتاندن ، پەیوەندیێت وانژی دھێن قەتاندن و وەڵاتێ کو ئاڵایێ وی دھێت شەوتاندن داخازا سزادانا بکەران دکەت ، لێ مخابن تو کەسەک لـ سەر ڤێ کریارا نەیاسایی نەھاتیە دەنگ و دڤێت داواکارێ گشتی سکاڵای لسەر وام بلڤینیت بـ تایبەت ئەڤان شوفێرێت کو ئاڵا دیتی و سەر ڕا بورین “.