هه‌تا نوكه ب تنێ 35 خێزانێن تلكێفێ زڤرینه‌ڤه
رپرسێ لیژنا پارتی ل قه‌زا تلكێفێ دیار كر: هه‌موو پێكهاتێن ئاینی د ناڤ تلكێفێ دا ده‌مێ تلكێف هاتیه داگیركرن ژلایێ تیرۆرستێن داعش ڤه ل سالا 2014ێ ل وێ ده‌مێ گه‌له‌ك ژ عه‌ره‌بان ناڤ تلكێفێ دا مان ئێزدی و مه‌سیحی و موسلمان نه‌مان، هه‌موو ئاواره بوون، هنده‌ك عه‌ره‌ب ژی ئاواره بوون. پشتی تیرۆرستێن داعش ل تلكێفێ نه‌ماین، حه‌شدا شه‌عبی ده‌ست خۆ دانایه سه‌ر تلكێفێ هه‌تا نوكه مه‌سیحی و كورد و هنده‌ك ژ عه‌ره‌بان ژی نه‌شیاینه ڤه‌گه‌رنه تلكێفێ”.
یه‌لدا شموئیل، به‌رپرسێ لیژنا پارتێ ل قه‌زا تلكێفێ راگه‌هاند، ژ سه‌رجه‌مێ هزار و 700 مالێن مه‌سیحیان ل تلكێفێ، هه‌تا نوكه 35 مالێن ل دووڤ پلێتا ئاهێن خوارنێ یێن زڤرینه تلكێفێ و هێشتا یێن دیتر هه‌موو نه‌زڤرینه سه‌ر مالێن خوه، چونكو مه‌سیحیان باوه‌ری ب حه‌شدا شه‌عبی نینه، له‌ورا نه‌شێن ڤه‌گه‌رن، هه‌روه‌سا ژی به‌ری سالا 2014ێ نێزیكێ 800 مالێن كوردان ل تلكێفێ بوون، لێ نوكه ب تنێ 150 مالێن كوردان زڤرینه تلكێفێ، هێشتا خه‌لكێ كورد ژی نه‌شیاینه ڤه‌گه‌رنه تلكێفێ كو 50 مالێن ئێزدی ل تلكێفێ هه‌بوون و نوكه چار مال یێن چووینه تلكێفێ ئه‌و ژی نه ڤه‌گه‌ریان”.
به‌رپرسێ لیژنا پارتی ل قه‌زا تلكێفێ گۆت:” ئه‌و عه‌ره‌بێن ئاواره‌بووین ده‌مێ تیرۆرستێن داعش سالا 2014ێ تلكێف داگیركری، هێشتا ئه‌و عه‌ره‌ب ژی نه‌زڤرینه سه‌ر مالێن خۆ، دبێژن چاڤێ مه یێ پێشمه‌رگێ كوردستانێ یه، هه‌ر ده‌مێ پێشمه‌رگه ڤه‌گه‌ریا تلكێف دێ عه‌ره‌ب ژی دگه‌ل مه‌سیحیان و كوردان زڤرنه سه‌ر مالێن خۆ، هه‌تا نوكه مالێن خه‌لكێ خرابكرینه، هه‌روه‌سا مه‌سیحیێن بانتایێ ژی نه‌شیاینه ڤه‌گه‌رن و ئێزدی و مه‌سیحیان باوه‌ری نینه ڤه‌گه‌رنه بن ده‌ستهه‌لاتا حه‌شدا شه‌عبی دا، خه‌لكی دڤێت ده‌مێ ڤه‌دگه‌رن بشێن ب ئازادی بێ ترس دناڤ خانیێن خۆدا بنڤن، خه‌لكی باوه‌ری ب گرۆپێن حه‌شدا شه‌عبی نینه، له‌ورا ژی خه‌لك ناڤه‌گه‌رنه تلكێفێ”.
یه‌لدا شموئیل، ئاشكه‌را كر: حه‌شدا شه‌عبی گه‌له‌ك هه‌ولده‌ت پۆستێن د ده‌ستێ كوردان دا ل تلكێفێ نه‌بن بۆ ڤی مه‌به‌ستێ ژی كه‌سێن سه‌ر حه‌شدا شه‌عبی ڤه بهێنه دانان، لێ هێشتا نه‌شیاینه پلانا خوه بجه بینن، ل هه‌لبژارتنێن رۆژا 10/10/2021ێ، گرۆپێن حه‌شدا شه‌عبی زۆر پاره مه‌زاختن دا كو گوهورینا تلكێفێ بكه‌ن، ب تنێ بابلیون پتر ژ دوو ملیار دیناران پاره مه‌زاختن د به‌رامبه‌ر دا هزار و 500 ده‌نگ ئینان، ل سه‌ر ئاستێ هه‌موو قه‌زا تلكێفێ ئه‌ڤێ چه‌ندێ حه‌شدا شه‌عبی بێ ئومیدكرن و نه‌شێن ده‌نگێن كوردان كێم بكه‌ن، پشتی هه‌لبژارتنان حه‌شدا شه‌عبی هه‌موو خه‌لك ئاگه‌هداركرینه نابیت هیچ كه‌سه‌ك بێ رازه‌مه‌ندیا حه‌شدا شه‌عبی هیچ كاره‌كێ ئه‌نجام بده‌ت، مه‌ره‌ما وان ئه‌و بوو خه‌لك پتر بترسن و خه‌لكی سزابده‌ن، چونكو نه‌شیا ده‌نگێن كوردان كێم بكه‌ن و نه‌شیان گوهورینان د پۆستێن كوردان ل تلكێفێ ئه‌نجام بده‌ن”.
