پەیامەک ژ سەروک سەروک بارزانی بو ملەتێ کورد
د حەفتێ و چارەمین ساڵڕوژا دەرباس بونا ڕێبەرێ نەتەویێ کورد بارزانیێ نەمر و ھەڤالێن وی لـ ڕیبارێ ئاراس و تومارکرنا داستانا ئیرادێ و ژیانەڤێ ، سەروک بارزانی پەیامەک بەلاڤ کر.
دپەیاما خودا سەروک بارزانی دبێژیت کو داستانا ئاراس وانەیەکا مەزنە بو نەفشێ نھا و داھاتی و سەلمێنەرێ ئەڤێ چەندێیە کو گەلێ کورد چ جاران خو بدەستڤە نادەت و دێ بەردەوام بیت ژبو ئازادکرنا وەڵاتێ خو.
دەقێ پەیاما سەروک بارزانی:
ئەڤڕو حەفتێ و چار ساڵ بورین لـ سەر داستانا دیروکیا پەڕینەڤا بارزانیێ نەمر و ھەڤالێن وی لـ ڕوبارێ ئاراس . لـ ١٨ێ حوزەیرانا ١٩٤٧ێـدا پشتی پێنجە و سێ ڕوژان شەڕ و بڕینا سنورێت ئیران و عیراق و ترکیا و ڕیبڕی بونا ئارتێش و چەکدارێن سێ دەولەت و پوچەلکرنا ھەڕەشێن دوژمنان لـ ڕێیەکا دیر و درێژ و سەختدا ، بارزانیێ نەمر و ھەڤالێن وی شیان لـ ڕیبارێ ئاراس تێپەڕن و بچنە ناڤا ئاخا ئێکەتیا سوڤیەت .ئەڤێ داستانێ ڕەھەندێت نەتەوی و دیروکی و سیاسی و سەربازیێت مەزن ھەبون،و کارتێکرنەکا ئێکلا کەرەوە بجھ ھێلان لسەر مانا دوزا ڕەوایا کورد لڤی دەمی و لـ قوناغێن بھێت.
پشتی ڕوخانا کومارا کوردستانێ لـ مەھاباد ، ھەمی ھەولێن دوژمنان ئەڤەبون کو دیماھیکێ بـ خەبات و تێکوشانا گەلێ کوردێ ستەم لێکری بـ ئینن و ئیرادا مروڤێن کورد بشکێنن.بەلێ دڤێ داستانا دیروکیدا ئیرادا گەلێ مە بـ سەر پیلانێت دوژمنان سەرکەفت و ئەڤ ئێکە سەلماند کو ئیرادا بەرخودان و خوبدەستڤەنەدانێ لـ ناڤ ڕولێت گەلێ کورد ھەر دێ مینیت و ئەڤ ئیرادەیە لـ ھەمی ھێز و ئارتێش و پیلانەکێ بـ ھێزترە. داستانا دیروکیا پەڕینەوا بارزانیێ نەمر و ھەڤالێن وی لـ ڕیبارێ ئاراس ، ڕەتکرنا داگیرکاری و بندەستیێ بو و ، ئومێدا مانەوە و خەبات لـ دلێ گەلێ کورد بـ زیندی ھێلا.
