بسەدەما نەما ئەمنیەتێ دەولەمەند و سەرکارێت کەرکوکێ بەر ب هەولێرێ دڕەڤن
دەنگێ بەهدینان
بسەدەما حوکمێ عەسکەرتاری ل کەرکوکێ و هەبونا میلیشیایان ل ناڤا ئەڤێ پارێزگەهێ ، ئەنجامدانا تاوانان زێدەبویە و پشتی ١٦ێ ئوکتوبەرێ دزی و کوشتن زێدەبوینە و دەولەمەند و سەرکار دهێن شەلاندن لەوما بەرب هەولێرێ دڕەڤن.
پشتی ١٦ێ ئوکتوبەرا ٢٠١٧ێ و نەمانا ئیدارا کوردی ل پارێزگەها کەرکوکێ و دەرکەتنا هێزێن ئاسایشێ و پێشمەرگەی لڤێ پارێزگەهێ ، تاوان ب ئاستەک بلند زێدە بوینە و خەلک ژبەر نەبونا تەناهیێ دڕەڤن و ئەڤی باژێڕی بجێ دهێلن ل گور پێزانینێت (( دەنگێ بەهدینان )) پڕانیا دەولەمەند و سەرکارێت کەرکوکێ بەرەڤ هەولێرێ دڕەڤن و نەشێن درێژیێ ب ژیانێ بدەن لڤێ پارێزگەها هەنێ ، لسەر ڤێ مژارێ سەرکارەکێ خەلکێ کەرکوکێ بناڤێ ( س،س،ج) ب (( دەنگێ بەهدینان )) راگەهاند ” بڕاستی پشتی ١٦ێ ئوکتوبەرا ٢٠١٧ ێ و نەمانا ئاسایش و ئەمنیەتێ لڤێ پارێزگەهێ ژیان نەما ، ئەم نەچارین ئەڤی باژێڕی بهێلین ، ئەو کەسێن کو خو ب پارێزەرێت تەناهیێ دزانن ب ڕوژ ، بشەڤێ دهێن بجلێن مەدەنی گەفان لمە دکەن و پارە و سەرانێ ژمە وەردگرن ، تانها من ٢ ملیون دولارێت داین ، ئەرێ ئەڤە ل پەی چ؟! ، هەولێر باشترین جهە کو ئەم بەرێ خو بدەینێ ، ڕوژ ب ڕوژ ڕەڤین ژڤی باژێڕی زێدەتر دبیت “.
