سەدەمێ گیروبونا ڕوفاتێن جینوسایدا شەنگالێ دھێت ئاشکەرا کرن
ئه‌ندامه‌كێ ده‌سته‌یا ڤه‌كۆلین و كۆمكرنا به‌لگه‌نامه‌یان ل پارێزگه‌ها دهوكێ دیار كر، 253 رۆفاتێن جینۆسایدا شنگالێ ل نۆشداریا داد ل به‌غدا ماینه و پشكینا DNA ل سه‌ر دهێته كرن، داكو ناسنامه‌یێن وان بهێنه ئاشكراكرن.
فه‌لاح حه‌سه‌ن، ئه‌ندامێ ده‌سته‌یا ڤه‌كۆلین و كۆمكرنا به‌لگه‌نامه‌یان ل پارێزگه‌ها دهوكێ راگه‌هاند: “357 رۆفات ژ ناڤ گۆرێن ب كۆم یێن شنگالێ هاتینه ده‌رخستن ب تنێ ناسنامه‌یێن 104 رۆفاتان ئاشكرابووینه و هیشتا ناسنامه‌یێن 253 رۆفاتێن ناڤ گۆرێن ب كۆم یێن بۆ نۆشداریا داد ل به‌غدا هاتینه ره‌وانه‌كرن ئاشكرا نه‌بووینه، ئه‌ڤه ده‌مه‌كێ درێژه رۆفاتێن قوربانیێن جینۆسایدا شنگالێ بۆ به‌غدا هاتینه ره‌وانه‌كرن و هێشتا ناسنامه‌یێن وان ئاشكرا نه‌بووینه‌ن ژبه‌ركو پشكنینا DNA ل سه‌ر دهێته كرن”.
فه‌لاح حه‌سه‌ن ئاشكه‌را كر كو ل شنگالێ 82 گۆرێن ب كۆم هه‌تا نوكه یێن هاتینه دیتن، سالا 2014ێ ژلایێ تیرۆرستێن داعش ڤه خه‌لكێ شنگالێ تێدا هاتینه گولله‌بارانكرن، د قووناغا ئێكێ دا 20 گورێن ب كۆم هاتینه ڤه‌كرن و هه‌موو رۆفات بۆ نۆژداریا داد ل به‌غدا هاتینه ره‌وانه‌كرن ب مه‌ره‌ما ئه‌نجامدانا ڤه‌كۆلینێ ل سه‌ر رۆفاتان و ئاشكراكرنا ناسنامه‌یێن قوربانیێن جینۆسایدا شنگالێ.
