ل هەمبەر راگرتنا شەرێ پەکەکێ و تورکیا پێدڤی یە پارتێن کوردستانێ ئێکدەنگ بن
دەنگێ بەهدینان
وەکو دیارە ئوپراسیونا سوپایێ تورکیا ب رێیا بالەفرێن شەری و توپخانە و پیادە ژی ل هەرێما کوردستانێ دژی پارتا کرێکارێن کوردستانێ یا بەردەوامە ب تایبەتی ل دەڤەرا بەرواری بالا و باتیفا و ل چەند روژێن بوری هژمارەکا گوندێن نوو هاتینە چولکرن، شارەزایەکێ سیاسەتا تورکیا ژی دیارکر کو راگرتنا شەری پێدڤی ب ئێکدەنگی یا پارتێن هەرێما کوردستانێ هەیە.
عادل خێرکی، شارەزا د سیاسەتا گشتی یا تورکیا بو ڕاگەهاند،هەتا نوکە، چوو زەلالی د هەلویستێن سەرکردایەتیێن پارتێن سیاسی یێن هەرێما کوردستانێ دا نەبوویە لدۆر شەرێ پەکەکێ و تورکیا ل سنۆرێ ئاخا هەرێما کوردستانێ دا، ئەڤ یەک ژی بوویە ئەگەر کو کۆدەنگیا سیاسی ژبۆ راوەستاندنا شەری پەیدا نەبیت و هەموو پارتێن سیاسی ل کوردستانێ ئێک دوو تۆمەتبار بکەن ل سەر پشتەڤانیکرنا هەر ئێک ژ ڤان هەردوو لایەنان.
زێدەتر گوت، تا ڕاددەیەکێ ئەم گیرۆ ژی بووینە، بەلێ ئەگەر ل سەر مێزێ ئێکدەنگی و ئێک هەلویستی یا پارتێن کوردستانێ لدۆر راوەستاندنا شەرێ تورکیا و پەکەکێ پەیدا نەبیت بێگۆمان دێ خەلکێ کوردستان زیانێن مەزن بینن و کوردستان ژی دێ کەڤیتە ژێر فشارێن داگیرکاری دا چ ژلایێ تورکیاڤە یان ژی ئیرانێ.
ناڤبری دیارکر ژی کو گرنگە پەرلەمانێ کوردستانێ و سەرۆکاتیا هەرێمێ و هەموو پارتێن سیاسی دەست ب زەلالکرنا هەلویستێ خوە بکەن و ناکوکیێن حزبی بدەنە لایەکێ و هەر ئێک ژ وەلاتێن ئەمریکا و بەریتانیا و فەرەنسا و جڤاکا نێڤدەولەتی ئاگەهدار بکەن کو کار بهێتەکرن شەرێ پەکەکێ و تورکیا بهێتە راوەستاندن ل سەر ئاخا هەرێما کوردستانێ و رێک ب هەردوو لایەنا نەهێتە دان تێکدانێ بکەن و گوت ژی، هەر شەرەکێ ل کوردستانێ دروست دبیت دێ سەرێ خەلکێ کوردستانێ خۆت و زیانێن زور ل کوردستان و وەلاتی و پێگەهێ هەرێمێ ژی دەت.
