رێڤه‌به‌رێ كوالێتیا ده‌رمانان: دێ بهایه‌كێ ئێكگرتی ل سه‌ر ده‌رمانان هێته دانان
پشتی پێكئینانا كابینا نه‌هێ یا حوكمه‌تا هه‌رێما كوردستانێ ده‌ست ب پڕۆسا چاكسازیێ د كه‌رتێ ده‌رمانان هاتیه‌كرن و چه‌ندین بڕیار بۆ ئینانا ده‌رمانان ل ده‌رڤه هاتینه ده‌ركرن. رێڤه‌به‌رێ كوالێتیا جۆرێ ده‌رمانان ژی دبێژیت: چه‌ندین بڕیار بۆ باشتركرنا كوالێتا ده‌رمانان هاتینه ده‌ركرن و ئه‌گه‌ر ئه‌و چاكسازیه یا به‌رده‌وامبیت دێ ئینانا ده‌رمانێن قه‌چاغ دووماهی بهێت و نامینیت، هه‌روه‌سا ئاماژه‌كر، ب تنێ ئه‌ڤ ساله مه ٢٢ كۆمپانیا سزاداینه و هنده‌ك ژ وان نوكه ل دادگه‌هێ نه.
دكتۆر شێروان سادق، رێڤه‌به‌رێ كوالێتیا ده‌رمانان بۆ میدیایان دیار كر کو “ئێك ژ بڕیارێن گرنگ یێن هاتینه ده‌ركرن بۆ كه‌رتێ ده‌رمانان ئه‌ڤه هه‌ر فه‌رمانبه‌ره‌كێ ئێڤاریان كارێ ده‌رمانی بكه‌ت نابیت ل رێڤه‌به‌رایه‌تیا كوالێتیا ده‌رمانان كار بكه‌ت، ده‌ستپێكا ئه‌ڤساله ئه‌و بڕیاره هاتیه بجهئینان، چه‌ندین بڕیارێن گرنگ بۆ كه‌رتێ ده‌رمانان هاتینه ده‌ركرن، ژ وان ژی مه لیستا ده‌رمانێن نیشتیمانی به‌رهه‌ڤكریه و ده‌رمان و جۆرێن ده‌رمان و پێدڤیێن ساخله‌می هاتینه جوداكرن و پێداچوونه‌كا ته‌مام بۆ هاتیه‌كرن، هه‌ر ده‌رمانه‌كێ نوكه دهێته هه‌رێما كوردستانێ پێدڤیه ئه‌و ده‌رمانێن تێنه هه‌رێما كوردستانێ كارگه‌هێن وان ده‌رمانا هاتبن تۆماركرن بێی تۆماركرن رێكێ ناده‌ین ده‌رمانێن چو كارگه‌هان بهێنه ناڤا هه‌رێمێ.
خویاژی كر، هژماره‌ك پیڤه‌ر هاتینه دیاركر بۆ ئینانا ده‌رمانان و هه‌ر كۆمپانیا و كارگه‌هه‌كا به‌رهه‌م ئینانا ده‌رمانان یا باوه‌رپێكری نه‌بیت لسه‌ر ئاستێ جیهانێ و ژلایێ رێكخراوا ساخله‌میا جیهانی رازیبوون لسه‌ر نه‌دابیت نابیت ده‌رمانێن وان كارگه‌هان بهێنه هه‌رێما كوردستانێ، واته ده‌رمانێن كوالێتیا وانا باش تێنه هه‌رێمێ و بێی كوالێتیا بلند چو ده‌رمانه‌ك ناهێته كوردستانێ، ئه‌ڤه بۆیه ئه‌گه‌ر ئینانا ده‌رمانێن خراب بشێوه‌یه‌كێ به‌رچاف كێم ببن، ئه‌ڤێ بڕیارێ كاریگه‌ریێن زۆر لسه‌ر كه‌رتێ ده‌رمانان هه‌بووینه.
رێڤه‌به‌رێ كوالێتیا ده‌رمانان گۆت” هه‌ر كۆمپانیه‌كا ل گۆره‌ی بڕیار و رێنمایێن وه‌زاره‌تا ساخله‌میێ كارنه‌كه‌ت دێ كارێن ئه‌ڤێ كۆمپانیێ هێنه راگرتن، هه‌تا نوكه كارێ ٣٣ كۆمپانیێن ده‌رمانان هاتینه راگرتن، چونكه ل گۆره‌ی رێنمایان كار نه‌كریه، ل هه‌رێما كوردستانێ ٣٩٠ كۆمپانیا هه‌نه تایبه‌ت ب كه‌رتێ ده‌رمانان و پێدڤیێن ساخله‌می، ژ وان ژی نێزیكی ٢٤٠ كۆمپانیا كارێ وان تنێ یێ ئینانا ده‌رمانانه و یێن دی ژی تایبه‌تن ب كه‌لوپه‌لێن دی و ئامیرێن نۆژداری، ب تنێ ئه‌ڤ ساله ٢٢ كۆمپانیێن ده‌رمانان هاتینه سزادان، ڤێجا هه‌نه ب پاره هاتینه سزادان هه‌نه ژی مه داینه دادگه‌هێ.
دكتۆر شێروان سادق ئاشكرا كر “حوكمه‌تا هه‌رێمێ ٣٥ ولات دیاركرینه بۆ ئینانا ده‌رمانێن كارگه‌هێن وان، كارگه‌هێن ولاتێن دی رێكێ ناده‌ینێ، چونكه ژلایێ كوالێتی ڤه زۆر باش نینه، مه نه‌ڤێت ده‌رمانێن بێ كوالێتی بهێنه ناڤا هه‌رێما كوردستانێ، ئه‌و بڕیار و چاكسازیێن كه‌رتێ ده‌رمانان هاتینه‌كرن دێ بنه رێگر ده‌رمان ب قه‌چاغی نه‌هێنه هه‌رێما كوردستانێ و ئه‌گه‌ر هه‌تا ساله‌كێ ئه‌و بڕیار بهێنه بجهئینان ٩٥%ێ ئینانا ده‌رمانێن قه‌چاغ نامینن، هه‌تا مه لبه‌ره بهایه‌كێ ئێكگرتی بۆ ده‌رمانان دانین، به‌ری نوكه ده‌رمان ل ژێده‌رێن جودا دهاتنه بازاڕی و هه‌ر ده‌رمانخانه‌كێ بهایه‌ك لسه‌ر ده‌رمانی دانابوو، مه ژۆره‌ك هه‌یه بۆ دیاركرنا بهایێ ده‌رمانی و سپیكه‌ر دێ لسه‌ر هه‌موو ده‌رمانه‌كی هێته‌دانان و پلانامه ئه‌ڤه بها ژی ل سه‌ر ده‌رمانی بهێته دیاركرن، هه‌تا ئه‌و جوداهیا نوكه هه‌ی دناڤبه‌را ده‌رمانخانان لسه‌ر بهایێ ده‌رمانی نه‌مینیت.
