بوچی لاھور تلیاکچی بـ بێدەنگی کورسی ھێلا؟!
دەنگێ بەھدینان
ئەندامەکێ جڤاتا سەرکرداتیا ئێکەتیێ لـ سەر سەدەمێ بێدەنگی و بێ ھەلوێستیا لاھور تلیاکچی لـ سەر لادانا وی ژ پوستێ نیفسەروکیێ ئێکەتیێ بـ (( دەنگێ بەھدینان )) ڕاگەھاند ” لاھور تلیاکچی بـ نەچاری ناڤێ ئێک ڕێزیێ دئینیت دەمێ بەحسا قەلعاندنا وی دھێتە کرن ، ئەو نەژبەر ئێک ڕێزیا ئێکەتیێ بێدەنگە ، بەلکو ھەمی بەلگەھ لسەر ڤی کەسی ددەستێ بافڵ تاڵەبانیدانە و دکاریت وی لـ دادگەھا نێڤدەولەتی ژیک بدەتە دادگەھێ “.
ھەروەسا دبێژیت ” دنھادا لاھور نکاریت بچیتە دەرڤەی وەڵات ژبەرکو دەستێ دگەل دەزگەھێت سیخوڕیێت ئەمریکا و بریتانیا ھەبو دژی ئیران و ڕوسیێ ، د ئالیەکێ دندا دەستێ وی دگەل ھەوالگەریا میلیشیایێن حەشدا شەعبی ھەبو دژی ئەمریکا و بریتانیا ، ئەوی دەست دگەل ئێرشا بەرێ چەند مەھەکا ھەبو یا میلیشیایان بوسەر کاروانێ دیپلوماسیێ بەریتانیا ، لەوما نەشێت بزڤڕیتە ئەڤی وەڵاتیش ، ژبەرکو بافڵ ھەمی بەلگەھا دێ لسەر ئاشکەرا کەت “.
لسەر مژارا ژەھر خارکرنێ گوت ” بابەتێ ژەھرخار کرنا بافڵ ژلایێ لاھور تلیاکچیڤە ڕاستە ، لێ ژوێ مەستر یاکری ، بەری چەند ساڵەکا کوسرەت ڕەسول ژەھرخار کربو لێ نەمرت ، ھێروخان ژەھر خار کر نەمرت بەس کەلەخەکێ بێ جان ھێلا ، کوشتنا قایمقامێ سلێمانیێ و پارێزڤانێ مام جەلال ھەردوو بـ فەرمانا لاھور تلیاکچی بونە و پلانا تیرور کرنا وان ژلایێ پولادێ برایێ وی ھاتیە جیبجی کرن ، کو ئەو بەرپرسێ دوسیا ئیغتیالاتابو “.
زێدەتر گوت ” گروپا ئیغتیالاتا کارێ وێ تیرور کرنا کەسایەتیێت سیاسی و حکوومی و چالاکڤان و میدیاکار و پەنابەران بو ، پولاد ژەنگی تیم لێدەربو ، گروپا بازرگانی کرن بـ مادێن ھوشبەر ژلایێ ئاراس ژەنگی دھات بڕێڤەبرن ، گروپا بازرگانی کرن بـ مروڤان ژلایێ ئاسو جەنگی دھات بڕێڤە برن ، ئەڤانە ھەمی کار بـ ڕول دابەشکرن دکر ، لەوما دنھادا ئێک ژوان نەشێت بـ ئێک پەیڤ دژی کوڕێت مام جەلال باخڤیت ، بەلگەھێت وانا ھەمی ددەستێ ماڵباتا مام جەلالدانە “.
ئەڤی ئەندامێ جڤاتا سەرکرداتی زێدەتر گوت ” لاھور ھەر لڤینەکا بکەت د زراراویدایە ، لەوما دخازیت بـ بێدەنگی خو ژ ئەڤان تاوان و کریارێت چەپەڵ ڕزگار بکەت ، تو ھەڵوێستەک لسەر ئەڤێ دەرکرنێ نەبویە ، ئەو سەدەمێ کو ئەو لـ میدیایدا دبێژیت تشتەک نەڕاستە و تەنێ ژبو ڕی سپی بونا خویە لـ ناڤ خەلکەکیدا ، ھەمی دیکومێنت لبەر دەستن لسەر ئەڤان زانیاریێن ھەنێ ، لێ ئاشکەرانەکرنا وان ژبەر چەند پرسەکایە کو تایبەتن بـ دوخێ نافخویێ ئێەکتیێ ، ئەو کەسێ ئاخ و ملەتی بفروشیت لـ پێناڤ بدەست ئینانا پارە و دەسەڵاتێ ، چاوا بڤی ڕەنگی دێ بێدەنگ بیت؟!”.
