د جه‌ژنێ دا 323 زارۆ ل پارێزگه‌ها دهۆكێ ژ دایكبووینه
به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ دیار كر، چار هزار و 683 كه‌سان د رۆژێن جه‌ژنا قوربانێ دا سه‌ره‌دانا پشكێن ته‌نگاڤیان كرینه، 323 زارۆ ژ دایكبووینه، حه‌فت كه‌سان ژ ئه‌گه‌رێ روودانێن هه‌مه‌جۆر گیانێ خوه ژ ده‌ستداینه و 22 كه‌سان ژ به‌ر نه‌خۆشیێن وه‌كو جه‌لتێن دلی و مه‌ژی و نه‌خۆشیێن دۆمدرێژ گیانێ خوه ژ ده‌ستداینه.
حه‌مزه ره‌زیكی، به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ د كۆنگره‌كێ رۆژنامه‌ڤانی دا راگه‌هاند:” ئامارێن ل ده‌زگه‌هێن ساخله‌میا دهۆكێ د هه‌ر چار رۆژێن جه‌ژنا قوربانێ دا هاتینه تۆماركرن ب ڤی شێوه‌ی نه، 81 نشته‌رگه‌ری دگه‌ل 10 قه‌سته‌رێن ب له‌ز یێن دلی هاتینه ئه‌نجامدان، 506 كه‌س ل ده‌زگه‌هێن ساخله‌میێ هاتینه نڤاندن بۆ وه‌رگرتنا چاره‌سه‌ریێ”.
ئاشكرا ژی كر كو 23 حاله‌تێن كه‌تن ژ بلنداهیان یێن هاتینه تۆماركرن و 11 روودانێن ب شه‌ڕچوونێ و روودانێن كاره‌بێ هاتینه تۆماركرن و 185 قورچێن كیمیاوی بۆ نه‌خۆشێن سه‌نته‌رێ چاره‌سه‌ریا په‌نجه‌شێرێ هاتینه‌دانان.
ره‌زیكی گۆت: “تیمێن 122 ژی د جه‌ژنا قوربانێ دا 118 په‌یوه‌ندی پێ هاتینه كرن، ژ وان ژی 74 كۆرۆنا بووینه و 47 ژی حاله‌تێن گشتی بووینه و 56 ژ وان ژی بۆ ده‌زگه‌هێن ساخله‌میێ هاتینه ڤه‌گوهاستن”.
به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ ئه‌و ژی خویا كر كو د رۆژێن جه‌ژنێ دا 15 هزار و 419 پشكنینێن كورۆنایێ هاتینه ئه‌نجامدان و دو هزار و 218 تووشبوویی هاتینه تۆماركرن و هزار و 590 تووشبوویی ژی چاره‌سه‌ربووینه و 20 تووشبوویان ژی د جه‌ژنێ دا گیانێ خوه ژ ده‌ستداینه.
