” کابینا نەھێ بزاڤێن باش ژبو سەقامگیریا ئابوریا کوردستانێ یێت ھاڤێتین “
ئه‌ندامه‌كێ جڤاتا نیشتمانی یا بزاڤا گۆران به‌حسێ په‌یوه‌ندیێن باش یێن حزبا خوه ل گه‌ل پارتی دیموكراتی كوردستان دكه‌ت و دبێژیت، مه په‌یوه‌ندیه‌كا باش ل گه‌ل پارتی یا هه‌ی و مه رێككه‌فتن ژی ل گه‌ل پارتی هه‌یه، دیاركر ژی كو پێدڤیه ئه‌م هه‌موو پشته‌ڤانیێ ل گاڤێن چاكسازیێ یێن كابینا نه‌هێ یا حوكمه‌تا هه‌رێما كوردستانێ بكه‌ین، هه‌روه‌سا ئاماژه كر ژی كو حوكمه‌تا هه‌رێمێ گاڤێن باش بۆ سه‌قامگیریا ئابووری ل هه‌رێما كوردستانێ یێن ئه‌نجامداین.
نزار مه‌حموود، ئه‌ندامێ جڤاتا نیشتمانی یا بزاڤا گۆران بـ میدیایان ڕاگەھاند ” په‌یوەندیێن پارتی دیموكراتی كوردستان و بزاڤا گۆران د نوكه دا د ئاسته‌كێ گه‌له‌ك باش دانه و مه رێكه‌فتن ژی ل گه‌ل پارتی یا هه‌ی د پێكئینانا كابینا نه‌هێ یا حوكمه‌تا هه‌رێما كوردستانێ دا، ب هه‌ڤپشكی ل گه‌ل ئێكه‌تی نیشتمانی كوردستان، دیاره په‌یوه‌ندیێن بزاڤا گۆران و پارتی د ئاسته‌كێ باش دانه چونكی د ده‌مه‌كی دا سێ لایه‌ن حوكمه‌تێ پێكبینن، پێدڤیه په‌یوه‌ندیێن وان گه‌له‌ك د باش بن”.
وی ئه‌ندامێ جڤاتا نیشتمانی یا بزاڤا گۆران گوتژی” دڤێت هه‌رسێ لایه‌نێن سه‌ره‌كی یێن پشكدار د پێكئینانا كابینا نه‌هێ یا حوكمه‌تا هه‌رێما كوردستانێ دا كار بۆ وێ چه‌ندێ بكه‌ن كابینا نه‌هێ یا سه‌ركه‌فتی بیت و بشێت خزمه‌تا خه‌لكێ هه‌رێمێ بكه‌ت و هه‌روه‌سا دووماهیێ ژی ب وان قه‌یرانێن ل هه‌رێمێ هه‌ین ب دووماهی بینیت”.
خویاكر ژی” ئه‌م دشێین بێژین سه‌ره‌رای وان هه‌موو قه‌یرانان، كابینا نه‌هێ یا حوكمه‌تا هه‌رێمێ هنده‌ك گاڤێن گرنگ یێن هاڤێتین هه‌رچه‌نده ئه‌و گاڤ ژی د ده‌ستپێكێ دانه، به‌لێ د پاشه‌رۆژه‌كا نێزیك دا دێ ئه‌نجامێن وان دیاربن”.
هه‌روه‌سا گوت” هه‌رسێ لایه‌نێن سیاسی یێن سه‌ره‌كی د كابینا نه‌هێ یا حوكمه‌تا هه‌رێمێ دا نیه‌تا وان ئه‌وه كابینا نه‌هێ كابینا چاكسازیێ بیت و بشێت خزمه‌تا خه‌لكێ هه‌رێما كوردستانێ بكه‌ت”.
نزار مه‌حموود گوت ژی” كابینا نه‌هێ یا حوكمه‌تا هه‌رێمێ بزاڤێن باش ژی یێن ئه‌نجامداین بۆ ڤه‌گه‌راندنا سه‌قامگیریێ بۆ ئابوورێ كوردستانێ، هه‌كه بهێت و قه‌یرانێن مه‌زن نه‌هێنه پێش، دێ چاره‌سه‌ریا هه‌موو كێشان ژی كه‌ت”.
ئاماژه ب وێ چه‌ندێ ژی كر هه‌كه هه‌رسێ لایه‌نێن سه‌ره‌كی یێن پشكدار د كابینا نه‌هێ یا حوكمه‌تا هه‌رێمێ (پارتی و ئێكه‌تی و گۆران) بخوازن چاكسازیێ بكه‌ن، تنێ ب داهاتێ ناڤخوه‌یی یێ هه‌رێمێ ژ په‌ترۆلێ و خالێن سنووری و داهاتێ ناڤخوه حوكمه‌تا هه‌رێمێ دشێت مووچه‌ی ب تمامی بده‌ت و بودجا پرۆژان ژی بهێته ته‌رخانكرن و پرۆژه ب گشتی بكه‌ڤنه دوارێ بجهئینانێ دا، له‌وما پێدڤیه ئه‌م هه‌موو ب شێوه‌كی كار بكه‌ین د حوكمه‌تێ دا كو گاڤ ب گاڤێ ل گه‌ل چاكسازیێ دا بچین و پشت خوه ب به‌ستین و دڤێت حوكمرانیه‌كا وه‌سا بكه‌ین دۆست و نه‌یارێن مه پشته‌ڤانیێ ل مه بكه‌ن د سه‌ركه‌فتنا وێ دا.
