گوڕانکاریێت کابینا نەھێ بەردەوامن
ب مه‌ره‌ما زێده‌تر پێشڤه‌برنا خواندنا بلند و ڤه‌كۆلینێن زانستی و ب ئاماده‌بوونا وه‌زیرێ خواندنا بلند، د رێوره‌سمه‌كی دا سێ سه‌رۆكێن زانكۆیان ل پارێزگه‌ها دهۆكێ هاتنه گوهۆڕین.
ده‌ستپێكێ د رێوره‌سمه‌كی دا ل زانكۆیا زاخۆ سه‌رۆكێ زانكۆیا زاخۆ هاته گوهۆڕین، پاش ل زانكۆیا پۆلیته‌كنینكی یا دهۆكێ، سه‌رۆكێ وێ زایێ هاته گوهۆڕین و سه‌رۆكا نوو ده‌ست ب كاربوو ل دووماهیێ ژی ل هولا كۆنفرانسان ل زانكۆیا دهۆك، سه‌رۆكێ زانكۆیا دهۆك هاته خانه‌نشینكرن و سه‌رۆكه‌كێ نوو بۆ زانكۆیا دهۆك هاته‌دانان.
د. ئارام قادر، وه‌زیرێ خواندنا بلند و ڤه‌كۆلینێن زانستی د كۆنگره‌كێ رۆژنامه‌ڤانی دا دیار كر، ئه‌و خوشحاله د رێورسمێن ده‌ست ب كاربوونا سێ سه‌رۆكێن زانكۆیان ل پارێزگه‌ها دهۆكێ به‌رهه‌ڤبووی و گۆت: “گوهۆڕینا سێ سه‌رۆكێن زانكۆیان د چارچوڤێ گوهۆڕینا شه‌ش سه‌رۆكێن زانكۆیێن هه‌رێما كوردستانێ دایه و گوهۆڕینێن ئاسایی و كارگێری نه د كابینا نوو یا حوكمه‌تا هه‌رێما كوردستانێ دا، ئه‌ڤ هه‌رسێ سه‌رۆك زانكۆیێن هاتینه گوهۆڕین كه‌سانێن خودان رێز و به‌رهه‌مبوون، بۆ نموونه، سه‌رۆكێ زانكۆیا دهۆك نێزیكی 43 سالان خزمه‌ت د وارێ خواندنا بلند دا ل كوردستان و عیراق و سه‌ر ئاستێ نێڤده‌وله‌تی ژی هه‌بوویه، وه‌كو حوكمه‌ت پشته‌ڤانیا خوه بۆ سه‌رۆكێن نوو و هه‌موو زانكۆیێن هه‌رێما كوردستانێ دیار دكه‌ین”.
زێده‌تر گۆت: “ئه‌گه‌ر چو بره‌وشێن نه‌خۆش نه‌هێنه پێش، خواندنا ئه‌ڤ ساله ل 1/9/2021 وه‌كو هه‌موو سالان دێ خواندن ده‌ست پێ كه‌ت، مه هه‌ماهه‌نگیه‌كا باش ل گه‌ل وه‌زاره‌تا ساخله‌میێ هه‌یه ب مه‌ره‌ما وێ یه‌كێ مامۆستا و قوتابی ژ كۆرۆنایێ بهێنه پاراستن و ڤاكسین بۆ مامۆستا و فه‌رمانبه‌ر و قوتابیان بهێته‌دان، داخوازێ ژ هه‌موو مامۆستا و فه‌رمانبه‌ر و قوتابیان ژی دكه‌م كو ڤاكسینێ بدانن”.
جهێ ئاماژه‌كرنێ یه كو د. نازم، بوویه سه‌رۆكێ نوو یێ زانكۆیا زاخۆ، دكتۆر ئاری عادل، بوویه سه‌رۆكا زانكۆیا پۆلیته‌كنیكی یا دهۆكێ و دكتۆر داود سلێمان ژی بوویه سه‌رۆكێ زانكۆیا دهۆك.
