سیاسەتڤانەک: پارتی تاکە حزبە کو لسەر نەھجا ڕزگاریێ بەردەوامە

دەنگێ بەھدینان
د ھەڤپەیڤینەکێدا دگەل (( دەنگێ بەھدینان )) ، شڤان مزیری سیاسەتڤانێ کورد و چاڤدێرێ سیاسی ، دەربارێ یادا ٧٥ ساڵیا دامەزراندنا پارتیا دیموکراتا کوردستانێ و ڕوژا ژ دایکبونا ڕێبەر و سەروک بارزانی ڕاگەھاند ” بـ دامەزراندنا پارتیا دیموکراتا کوردستانێ ژلایێ بابێ ڕوحیێ کوردستانیانا مەلا مستەفا بارزانی، دوزا کوردان پێشڤەچونەک مەزن بخوڤە دیت ، ھەروەسا پەیکەرێ سیاسیێ کوردستانێ پێ ھات گوھڕین و شیا بڤێ پێنگاڤێ پەیوەندیێت نێڤ دەولەتی چێکەت ، ژبەرکو جڤاکا نێڤ دەولەتی پتر کاری دگەل حزبەکا سیاسی دکەت ژ بزوتنەوەکا ڕزگاری خاز ، ھەلگرێ پەیاما دیموکراسیەتێ باشترین و گرنگترین کاربو کو ددەمێ پێک ئینانا پارتی ھاتی ڕاگەھاندن ، چونکە دڤی دەمیدا ڕوژھەلاتا ناڤین باوەڕی بـ دیموکراسیەتێ نەبو و سیستەم و حزبێن سیاسی لـ نافچەیدا شوڤینی و دیکتاتوری و ئیشتیراکی بونە ، لەوما وەڵاتێت زلھێز پتر گرنگی بـ پەیوەندیێن خو دگەل پارتیا دیموکرات دا بـ تایبەت لـ عیراقێدا کو پڕانیا سیستەمێت دەولەتێ یێت کوماری ئیشتراکی بونە ھەتا ساڵا ٢٠٠٣ “.

ھەروەسا گوتژی ” پارتی تاکە حزبە کو وەک بزاڤەک ڕزگاری مایە و ھەردەمێ کوردستان ڕیبڕی مەترسیێ بوبیت ، بـ سەروک و کادر و ئەندام و ئالیگرێت پارتی ڤە ، بەرگری یا لـ کوردستانێ کری ، شەڕێ داعشێ نمونەکا ھەری زیندیا ڤێ پرسێیە”.

گوتژی ” بـ ھەبونا پارتی کوردستانێ پێشکەفتنەکا مەزن بخوڤە دیت ، ھەروەسا دوزا کوردان ژ پرسەک لوکالی بو پرسەک نێڤ دەولەتی و جڤاتا نێڤ دەولەتی ھاتە سەر خەت ، ئەڤەژی پشتی ساڵێت نوھەتان تا نھا دیارە “.

لسەر رولێ ڕێبەر و سەروک و بارزانی گوت ” سەروک بارزانی پێتڤیەک دیروکیە بو کورد و کوردستانیا بـ گشتی ، ژبەرکو شیا پێکڤە ژیانێ بچەسپینیت و بەرگریێ لـ تەڤایا کوردستانیان بکەت ، ھەروەسا بو چەترەک ژبو پارچێن دنژی ، بونمونە کوردستانا ڕوژئاڤا و ڕوژھەلات کو نھا ئەژمارەک زورا خەلکی مشەختی بونە و لـ ھەرێما کوردستانێ دژین ، ھەروەسا برایێت کریستیان پشتی کو لـ بەغدا و میسل ھاتین دەرکرن و کەتینە بن ترسا میلیشیا و ڕێکخراوێن تیرورستیێت مینا داعشێ و قاعیدێ ، ئەو فەرھەنگێ کو سەروک بارزانی چێکری لـ ھەرێما کوردستانێ کو پێکڤە ژیانە ، بو چەتر بو ڤان کەسانژی “.

ددیماھیکێدا گوت ” تەڤایا کوردستانیان شانازیێ بـ ھەبونا سەروک و بارزانی و حوکمێ پارتی دکەن ، پارتی بزاڤەک جەماوەریە و جھێ ھەمی ئول و ئاین و نەتەوان تێدا ھەیە ، لەوما ھەمی حزب وەریان لێ پارتی بھێزتر دبیت ڕوژ بـ ڕوژ ، ھەلبژارتنێن ٢٠١٨ یێن عیراقێ ئیسپات کر کو پارتی حزبەکا مەزنە لسەر ئاستێ عیراقێ و ئێکەم بو ، پێگەھێ ڤێ حزبێ ڕوژ بـ ڕوژ بھێزتر دبیت و د مەزن بونێدایە “.