سیاسەتڤانەک: قەرەیلان دان بـ قەوارە و سەروەریا ھەرێما کوردستانێدا نانیت و وڕێنا دکەت
دەنگێ بەھدینان
ددیماھیک دیدارا خودا قەرەیلان ھندەک تومەتان ئاراستەی پارتیا دیموکراتا کوردستانێ دکەت و چەند کارێت پەکەکێ بـ پارتی دیموکراتی کوردستان دبەخشیت ، لـ ھەمبەردا عەزیز مەولودی سیاسەتڤانێ کوردێ ڕوژ ھەلات بەرسڤا ئەڤان تومەت و وڕێنان ددەت و دبێژیت ” سەیرە قەرەیلان تومەتان ژبو ئالیەکی چێ دکەت ، ددەمەکیدا ئەو و پارتا خو تومەتبارن ، قەرەیلان ھێشتا دان بـ قەوارا ھەرێما کوردستانێ نەدانایە و ھەردەم ڕێکارێت حکومی بـ حزبی ددانیت ، ئەڤەژی پشکەکە ژ ستراتیژیەتا پەکەکێ کو حەش ژیانا کومونەیا دەستپێکی دکەت و تەنێ شکەفتان دناسن “.
ھەروەسا گوت ” تانھا پەکەکێ و سەرانێت وێ بەرسڤا ملەتێ کورد نەدایە ، کا ژبەر چ شەھید غازی ئالیخان تیرور کر ، ھەروەسا بەرسڤ نەدایە چما ئێرش کرە سەر پێشمەرگەی لـ مەتینا و پێنج پێشمەرگەھ شەھید کرن ، ئەرێ چاوا دێ چێ بیت تو بەرسڤ نەدەی و پرسیاران ژیک بکەی “.
گوتژی ” سەرانێت قەندیلێ ھەردەم بەحسێ شەڕێ براکوژیێ دکەن ، ئەڤەژی ڤێ چەندێ ئاشکەرا دکەت کو پەکەکێ دلێ ڤی شەڕێ ھەنێ یێ ھەین ، لەوما ھەردەم ڤێ ئاخفتنێ تەکەز دکەن .ھەرێما کوردستانێ بـ زەلالی ژێڕا گوتیە شەڕێ خو ژ ھەرێما کوردستانێ دور بێخن و ھەرن لـ باکور شەڕ بکەن ، ھەروەسا ھێلا سور بو دیار کریە کو چێ نابیت ببەزینن ، ئەوژی تەنێ نافچەیێن سنورینە کو دکارن تێدا بن و ڕێزێ لـ جیرانان بگرن ، لێ پەکەکە ھاتیە ناڤ باژێڕ و باژێڕوکان و دڤێت کەس ژی چ بەرسڤا ژبوی وان نەدەت مینا خەلیفانێ !”.
ئەڤەژی گوت ” ملەتێ کورد ئیدی تێگەھشتیە کو پەکەکە ناخازیت چ جھەک یێ ئازاد بیت ، ڕێکێ نادەت کوردستان ڕزگار ببیت و پێنگاڤا دھاڤێژیت ژبو داگیر کرنا وێ ژلایێ ترکانڤە ، لەوما ملەت ھەمی نەفرەتان لڤێ ستراتیژیەتا چەپەل دکەن و ئەو دەم بسەرڤە چو کو پەکەکە بھێت بـ ئاخفتنێت بریقەدار خەلکی سەرداببەت ، تەنانەت خەلکێ باکور ژی ئەڤ ڕاستیە یا بو دەرکەتی لەوما تانھا ئێک پێنگاڤا پشتەڤانیێ بو پەکەکێ نەھاتیە ھاڤێژتن دماوێ دو ساڵێن بوریدا ، تەنێ چەند کەسەک نەبن کو بـ فیتا پەکەکێ کومبون و ئێرشی سەر ھەرێما کوردستانێ “.
ددیماھیک ئاخفتنا خودا گوت ” بلا قەرەیلان ددەستپێکێدا دان بـ قەوارە و سەروەریا ھەرێما کوردستانێدا بنیت ، پاشێ بلا پسیار بکەت و لـ ھیڤیا بەرسڤەکێ بیت کو ژھەژی وان “.
