پەیاما سەروک بارزانی لـ یادا سیھ و سێ ساڵیا ئەنفالا بەھدینان

د یادا سیھ و سێ ساڵیا ئەنفالا دەڤەرا بەھدیناندا ، ڕێبەر و سەروک ( مەسعود بارزانی ) پەیامەک بەلاڤ کر و تێدا تەکەز لـ خوڕاگریا گەلێ کورد کر و ڕاگەھاند کو دوژمن ژناڤ چو و ئیرادا ملەتی سەرکەفت ، ھەروەسا داخاز ژ دەولەتا عیراقێ کر ، کو قەرەبویا ماڵباتێت شەھید و ئەنفالا بکەت.

دەقێ پەیاما ڕێبەر و سەروک ( مەسعود بارزانی )

بناڤێ خودێی مەزن و دلوڤان

سیھ و سێ ساڵ بەری نھا ڕژێما بەرێ یا عیراقێ د تاوانەکا دن و لـ دیماھیک قوناغێت ئەنفالێدا پشتی بوردمان و کیمیا باران کرنا پڕانیا دەڤەرا بەھدینان ، خەلکێ ڤان دەڤەرا و پێکھاتێن وێ ڕی بڕی دەستەسەر کرن و بێسەروشین کرن وڤەگوھاستنێ بونەڤە.دڤێ تاوانێدا حکومەتا عیراقێ بـ سەدان ھزار ھێزێن پرچەک لـ دژی دانیشتوانێن بێ تاوانێن بەھدینان بکار ئینان.

ئەڤ تاوانە درێژیا ڤان تاوان و کارەساتان بون کو لـ سەدەھێ بوریدا دژی کوڕ و کچێن گەلێ مە لـ بارزان و گەرمیان و ھەڵەبجەی و تەڤایا کوردستانێ بڕێڤە چوی.
دوژمنێت گەلێ کوردستانێ دپێش چاڤێت ھەمی جیھانێ بـ پێشکەفتی ترین چەک و کرێترین سیاسەت ژبو قر کرن و ژناڤ برنا گەلێ کوردستانێ بکار ئینا ، لێ گەلێ کوردستانێ خودان ئیرادە و قەزیەکا ڕەوا بو و لـ ھەمبەر ئەڤێ جینوساید و کومکوژیێ خو بدەستڤە نەدا و ئەڤە دوژمن و تاوانبار بون کەفتنە زبلدانا دیروکێدا. ئەڤە وانەیەکا پڕ مانایە ھەم بو کوڕ و کچێن گەلێ مە و ھەم ژبو نەیار و نەحەزێن گەلێ کوردستانێ.

دساڵیادا ئەنفالا بەھدیناندا سڵاڤ ژبو گیانێ پاکژێ شەھیدا و ئەنفالکریا دشینین و پێگریێ لـ سەر مافێن ڕەوایێن گەلێ خو دکەینڤە . دڤێت دەولەتا عیراقێ قەرەبویا جینوساید و ئەڤان تاوان و زولمانە بکەت کو دەرھەق ملەتێ مە ھاتیە کرن.

مەسعود بارزانی
٢٥ێ تەباخا ٢٠٢١