ل گۆرەیێ تێگەھ و پێناسەیا نوو ژبۆ حزبێ وەک رێکخستن و دسپلین ل کوردستانێ بتنێ پارتی حزبە
ل گۆرەیێ تێگەھ و پێناسەیا نوو ژبۆ حزبێ وەک رێکخستن و دسپلین ل کوردستانێ بتنێ پارتی حزبە
محەمەدێ میزوپوتامی:نڤیسەر
گەلەک جۆرەیێن پەیوەندییان ھەنە دناڤبەرا کتەکەسی و حزبێ دا. کتەکەس ل گۆرەیی جۆرەیێ پەیوەندی یا خوە یا ب حزبێ ڤە خودانێ ئەرک و ماف و ئازادیێن خوە یە بەرانبەر حزبێ. بۆ میناکێ ئەز؛ نە کادر، ئەندام، خەباتکارێ حزبەکێ مە و من ناسنامەیا چ حزبەکێ نینە. لێ ئەز دەنگدەرێ پارتی یا دیمۆکراتی یا کوردستانێ مە. جۆرەیێ پەیوەندی یا من دگەل پارتی رێکێ ددت من کۆ رەخنەیێ لێ بگرم، ژێ ئاجز ببم، بھاڤێژمێ. و چ گاڤا کۆ نە بدلێ من بت دەنگێ خوە نەدمێ. لێ دبت ئەڤە ژبۆ کادرەکی، ئەندامەکی ئان خەباتکارەکی نەبت ئان ژی ب زەھمەت بت!
ئەز ژ دنیایەکا کار و کریار و بەرنامەیێن پارتییێ نەرازی مە. لێ بەلێ، ل داویێ من حزبەک دڤێت کۆ دەنگێ خوە بدمێ. ئێ ل گۆرەیێ تێگەھ و پێناسەیا نوو ژبۆ حزبێ وەک رێکخستن و دسپلین ل کوردستانێ بتنێ پارتی حزبە.
د پێناسە و تێگەھێ نوو دا کۆمەکا کۆ ژبۆ زەختەکرنێ ل ھندەک ئالیان دا کۆ ھندەک دەین نەھێنە دان ئان دا رێ ھەبت گەف ل بازرگانیەکا دیارکری نەھێت کرن، نابت حزب. کۆمەکا کۆ ئارمانجا وێ نە ململانێ یا بدەستڤەئینانا دەستھەلاتێ بت و ھەما ھەبت بتنێ دا کۆ سەرۆکێ وێ خودان مۆنیکا و قەسر وقوسیرێن خوە بت وکادرێن وێ ژی بچنە پەرلەمانی چەند ملیۆنان وەربگرن دەنگێن کۆمێ بخوە ژ کاندیدان بھێن نەکۆ بەرڤاژی، نابت حزب. ئان ئێکا پارچە-پارچەکری یا کۆ کەس نزانت کی سەرۆکە، کی ئاخا یە و کی وەزیرە، بێ بەرنامە و بێ پلان بێ دستۆر و رێکخستن و پەیکەر، بێ ئارمانجەکا ئێکگرتی و دیارکری و ھەما بایێ قەدەرێ وێ دئینت و دبت، نابت حزب. کۆمەک ئان رەفەک بررەک چ زانم جەلەبەکێ کۆ ھاتی یە چێکرن کۆ سەرۆکێ وێ ژ مالبابێ زیز و زڤێر بوویە ژبەکۆ نازێن وی قەبوول نەکرینە ئان تشتەک ڤیایە و نەدایێ و پاشی وەکی دکانێ خەبەنگا وێ بئینت خار
قەت نابت حزب.
گەلەک ژڤان دکانن، بازارن، کۆمێن فشارکرن و بەرژەوەندیانن نە حزبن، نە ل گۆرەیی پێناسەیا نوو یێن دبستانێن مارکسی ئان لیبرالی بۆ حزبێ “کرامشی، موریسێ دوفرژی، ئیدمۆندێ بیرک” نەژی خوە یا ئبن مەنزۆری ل چەرخێ دوازدەھێ ژی.
