ھێژا مەسرور بارزانی : سوپاسیا خەلکێ کوردستانێ دکەم
دەنگێ بەھدینان
ھێژا مەسرور بارزانی سەروکێ حکومەتا ھەرێما کوردستانێ د پەیامەکێدا سوپاسیا خەلکێ کوردستانێ کر ، کو بەشدار بون لـ ھەلبژارتنێن پێشوەختێن پەرلەمانا عیراقێ .
ھەروەسا د پەیاما خودا ھێژا مەسرور بارزانی دبێژیت ” سوپاسیەکا گەرما ھاوڵاتیێت ھەرێما کوردستانێ و نافچەیێن کوردستانیێت دەرڤەی ئیدارا ھەرێما کوردستانێ دکەم ژبو بەشداری کرن لڤێ پڕوسەیا دیموکراسی و ھەست کرنا وان بـ بەرپرسیارێتیا لـ پڕوسا سیاسی و بەڕەڤانیکرن لـمافێن دەستوریێت ھەرێما کوردستانێ “.
ھەروەسا سوپاسیا ھێزێن پێشمەرگەھێ کوردستانێ و ئاسایش وپولیسان دکەت ژبو پاراستنا ئێمناھیا کوردستانێ و چێکرنا کەشەکێ ئارام ژبو بڕێڤە چونا پڕوسەیا دەنگدانێ .
د پشکەکادن یا پەیاماخو ، ھێژا مەسرور بارزانی سەروکێ حکومەتا ھەرێما کوردستانێ دبێژیت ” لـ چەند نافچەیەکێن کوردستانی یێت دەرڤەی ئیدارا ھەرێما کوردستانێ ژلایێ گروپەکا چەکداریا ژ یاسا دەرچوی ڕێگری لـ دەنگدەرا کری بگەھنە بنگەھێت دەنگدانێ ، کو ئەڤە جھێ نەڕازی بون و نیگەرانیا قولامەیە و دژی بنەمایێت دیموکراسی و مافێن ئازدیا بەشداری کرنێ یە لـ پڕوسەیا دەنگدانێ “.
ھەروەسا د پەیاما سەروکێ حکومەتێدا ھاتیە کو د پەیوەندیەکا تەلەفونیدا پیروزباھی لـ سەروک وەزیرێ عیراقێ کریە کو سوزا خو ژبو ھەلبژارتنا پێشوەخت و سەرخستنا وێ برە سەر ، ھەروەسا پشتەڤانیا خو بو سەروک وەزیرێ عیراقێ دوپات دکەت ژبو قوناغا کار بەڕێکەریێ.
ھەروەسا داخازا ئێک دەنگیا نێنەرێن کورد یێت دەرچوی دکەت و داخازێ ژێ دکەت بـ ئێک دەنگ کاربکەن ژبو بدەستڤە ئینانا مافێن دەستوریێت ھاوڵاتیێت ھەرێما کوردستانێ .
ددیماھیکێدا پەیامەکێ ئاراستەی تەڤایا بەربژێرێن دەرچوو دکەت و ڕادگەھینیت ” دخازم نێنەرێت ھەرێما کوردستانێ و نافچەیێن کوردستانی لـ جڤاتا نێنەرێن عیراقێ ، پشتا خو لـ ململانێ یێت نافخویی بکەن ھەمی لـ بەغدا بـ ئێک ڕێزی و ئێک ھەلوێستی ، کاربکەن ژبو بھێزبوما پێگەھێ ھەرێما کوردستانێ لـ عیراقا فیدڕاڵ ، و مافێن دەستوریێت کوردستانیان بھێن دەستەبەر کرن ، ژبو ڤێ ئارمانجێش دێ دگەل ھەمی ئالیان د پەیوەندیێدابین”.
