په‌رله‌مانتاره‌كا کرستیان: هه‌تا نوكه 15 گۆندێن كریستیانان هاتینه چۆلكرن
سه‌رۆكا فراكسیونا ئه‌نجومه‌نێ كلدانی و سریانی و ئاشوری ل په‌رله‌مانێ كوردستانێ راگه‌هاند، حكوومه‌تا عیراقێ كاردكه‌ت بۆ ژناڤبرنا کرستیانێن ل عیراقێ دژین و ئه‌و بووینه ئه‌گه‌ر كو ب چو ره‌نگان ئێدی مه‌سیحیان هیڤی بۆ ڤه‌گه‌ریانا خوه بۆ سه‌ر گۆند و مال و مۆلكێن خۆ نه‌مایه و گۆت: ژ سالا 2007 وه‌ره و هه‌تا نوكه، 15 گۆندێن كریستیانان هاتینه چۆلكرن.
كلارا عودیشۆ، سه‌رۆكا فراكسیونا ئه‌نجومه‌نێ كلدانی و سریانی و ئاشوری ل په‌رله‌مانێ كوردستانێ دیاردکەت، پشتی شه‌رێ داعش و هه‌ولا ژناڤچوون و ئاواره‌بوونا مه‌سحیان ژ عیراقێ بۆ هه‌رێما كوردستانێ، زیانێن مه‌زن ب گۆند و ده‌ڤه‌رێن مه‌سیحیان كه‌فتینه و هه‌تا نوكه ئه‌و گۆند و جهـ و ده‌ڤه‌رێن مه‌سیحیان نه‌هاتینه ئاڤه‌دانكرن و مه‌سیحیان چو هیڤی و ئۆمێد نینن، جاره‌كا دی ب ڤه‌گه‌رنه سه‌ر مال و مۆلك و گۆندێن خۆ.
خویاژی كر، پێدڤیه حكوومه‌تا عیراقێ به‌رێ خۆ بده‌ته ئه‌زمونا حكومه‌تا هه‌رێما كوردستانێ، وێ ئه‌زمونێ بۆ خۆ بكاربینن كا چاوا حكومه‌تێ هه‌رێمێ ب سه‌ركه‌فتیانه سه‌ر ڤێ ئه‌زمونێ سه‌ركه‌فتن ئینایه و چاوا شیاینه مه‌سحیان ل هه‌رێما كوردستانێ بپارێزن و رێزێ ل ماف و پاراستنا وان بگرن.
خویاژی كر، هژماره‌كا زۆر ژ وان گۆندێن حكوومه‌تا هه‌رێما كوردستانێ هه‌ر ژ سالا 2007 و هه‌تا نوكه ئاڤه‌دان كرین و خزمه‌تگۆزاری گه‌هاندینێ پتریا وان هاتینه ژناڤبرن و چۆلكرن و ئه‌ڤه ژی هه‌موو ژ ئه‌گه‌رێ شه‌رێ په‌كه‌كێ و توركیا یه ل سه‌ر ده‌ڤه‌ر و گۆندێن كریستیانان و گۆت: هه‌تا نوكه 15 گۆندێن كریستیانان ب تمامی هاتینه چۆلكرن.
سه‌رۆكا فراكسیونا ئه‌نجومه‌نێ كلدانی و سریانی و ئاشوری ل په‌رله‌مانێ كوردستانێ ئه‌و یه‌ك ژی دیار كر، پێدڤیه كریستیانێن كوردستانێ و پارت و لایه‌نێن سیاسی و ئاینی رێگریێ ل ڤان جۆره كریارێن په‌كه‌كێ بگرن و نه‌هێلن ئێدی چو كاره‌ساتێن مینا هاتنا داعشێ ب سه‌ر مه‌سیحیان دا بهێن.
