خسرۆ گوران: به‌ربژارێن پارتی دێ به‌ر ب هه‌موو ده‌ڤه‌ران چن بۆ هه‌وا هه‌لبژارتنان
به‌رپرسێ ده‌زگه‌هێ هه‌لبژارتن یێ پارتی دیموكراتی كوردستان راگه‌هاند، مه وه‌كو پارتی خوه به‌رهه‌ڤ كریه بۆ هه‌لبژارتنان و چاڤه‌رێی رۆژا ده‌نگدانێ نه.
خسرۆ گوران، به‌رپرسێ ده‌زگه‌هێ هه‌لبژارتن یێ پارتی گوت” پارتی دیموكراتی كوردستان ل هه‌موو ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ هه‌ر ژ مه‌ندلی هه‌تا شنگالێ به‌ربژار بۆ هه‌لبژارتنان یێن هه‌ین”.
گوتژی” مژوولی ڤه‌كرنا باره‌گایێن پارتی نه ل هنده‌ك ده‌ڤه‌رێن كوردستانی و دووپاتیێ ل سه‌ر وێ چه‌ندێ ژی دكه‌ین كو به‌ربژارێن پارتی دێ به‌ر ب هه‌موو ده‌ڤه‌ران چن بۆ هه‌وا هه‌لبژارتنان و كه‌س نه‌شێت رێگریێ لێ بكه‌ت”.
سه‌باره‌ت ڤه‌گه‌راندنا باره‌گایێن پارتی ل كه‌ركووكێ، به‌رپرسێ ده‌زگه‌هێ هه‌لبژارتن یێ پارتی گوت” د دانوستاندنان داینه ل گه‌ل به‌غدا بۆ راده‌ستكرنا باره‌گایێن مه و هه‌موویان مافێ خوه به‌ربژاركرنێ و ده‌نگدانێ یێ هه‌ی، كه‌س نه‌شێت رێگریێ ل به‌ربژارێن كه‌سێ بگریت، چونكی ئه‌و مافه‌كێ دستووری یه”.
خسرۆی گوتژی” به‌ربژارێن پارتی ل شنگالێ و خورماتو و هه‌موو ده‌ڤه‌ران كارێن خوه دكه‌ن و د نوكه دا مژوولی ڤه‌كرنا باره‌گایانه ل مه‌خموورێ و مووسلێ و كه‌ركووكێ و جهێن دی بۆ پاشه‌رۆژێ”.
هه‌روه‌سا گوت” بۆ هه‌موو هه‌لبژارتنان ئه‌م لژنه‌كا بلند یا هه‌لبژارتنان دروست دكه‌ین و كه‌سه‌ك سه‌رپه‌رشتیا وێ لژنێ دكه‌ت، جار هه‌بوو (فازل میرانی) سه‌رپه‌رشتیا وێ لژنێ دكر، جار ژی هه‌بوو كه‌سه‌كێ دی سه‌رپه‌رشتی دكر، بۆ ڤێ جارێ ژی (هشیار زێباری) ئه‌ندامێ مه‌كته‌با سیاسی دێ سه‌رپه‌رشتیا وێ لژنێ كه‌ت”.
