١٦ ێ تەباخێ ، بەرسڤ و ئۆمێد و بناغێ سەرخۆبوونێ
غەیاس خالد
ئەڤرۆ گەلێ کورد پێشوازیێ ل سالڤەگەرا ٧٥ سالیا دامەزراندنا پارتی دیموکراتی کوردستان ب سەرۆکاتیا بارزانی نەمر دکەت ، ١٦ ێ تەباخێ رۆژەکا بریسقەدارە د دیرۆکا سیاسی یا گەلێ کورد ب گشتی و بزاڤا رزگاریخوازیا کوردستانی دا ب رەنگەکێ تایبەت ، ھەرچەندە دامەزراندنا پارتی دیموکراتی کوردستان ل سەردەمێ کۆمارا کوردستان ل مەھاباد بوو لێ لێ ھێشتا د مەھێن خۆ یێن دەسپێکی دا بوو دەمێ لناڤ چوونا ڤێ کۆمارا بێ ئۆمێدی یە دژوار دناڤ خەلکێ کوردستانێ ب گشتی درۆست کربوو و ئاییندێ بزاڤا سیاسی یا کوردستانی یێ نەدیار بوو ، لەوما ب دامەزراندنا ڤێ پارتیێ لسەر بنەمایەکێ دیموکراسی و ھەلگرا پەیامەکا نەتەوی و نشتیمانی تا رادەیەکی ئەو ئۆمێد زڤراند ، دوژمنێن کوردان ژی پشتی لناڤ چوونا کۆمارا کوردستان د وێ باوەریێ دا بوون چرایێ بزاڤا رزگاریخوازیا کوردستانی ڤەمریا و ئەگەر ھەلبیتەڤە ژی دەمەکێ درێژ پێ دڤێت . لێ بارزانی نەمر ب دامەزراندن و چالاککرنا پارتی دیموکراتی کوردستان بەرسڤا وان دوژمنا دایەڤە و مەشخەلێ بزاڤا سیاسی یا کوردستانێ وەنەکر ڤەمریت و لسەر بنەمایەکێ موکومتر و رێکخستی تر نووژەن کرەڤە ، لەما دبێژین ١٦ ێ تەباخێ باشترین بەرسڤ بوو بۆ داگیرکەرا . ژلایێ ھەستا نەتەوی و نشتیمانی دامەزراندنا پارتی دیموکراتی کوردستان ل دەمەکێ کێم دا ل باشوورێ کوردستانێ ئۆمێد بەخشی بەڵاڤ کر و پرانیا خەلکێ کوردستانێ ب ھەمی تەخ و چین و ئۆل و مەزھەب پێشوازی لێ کر . شیا ل زۆترین دەم لسەرانسەرێ کوردستانێ دەست ب چالاکیان بکەن و ئەو کاریگەرا لناڤ چوونا کورمارا کوردستان ل مھاباد ڤەرەڤان و ئۆمێد درۆست کرەڤە . ھەرچەندە درۆشمێن ئاشکرا بۆ باشوورێ کوردستانێ برێڤەبرن و رەوشەنبیری بوون لێ د بنەرەت دا ھەلگرا پەیامەکا نەتەوی و نشتیمانی بوو و بناغەیەک بوو بۆ درۆست کرنا ھەستا نەتەوی و خۆ بەرھەڤکرن بۆ درۆستکرنا بنەمایێن دەولەتەکا کوردی و گەھشتنا مللەتێ کورد ب مافێن خۆ یێن نەتەوی و نشتیمانی ، ھەر وەکی بارزانی نەمر د فەرمۆدەیەکا خۆدا کەرەمکری ( ھیڤیا من ئەوە ھەمی پارچێن کوردستانێ رزگار ببن و ئێک بگرن و دەولەتەکا کوردی بھێتە دامەزراندن ) و ھەر ژبووی ڤێ مەبەستێ ژی پارتی دیموکراتی کوردستان دەست ب خەباتا سیاسی و لەشکری و رەوشەنبیری کر و سەرپەرشتیا شۆرەشێن ئیلۆن و گۆڵانی دکر و بڤان شۆرەشا ھێمێ دەولەتبوونێ مۆکۆمتر بوو دوزا سیاسی یا کوردستانێ لسەر ئاستێ جیھانێ ھاتە نیاسین . ئەڤرۆ ژی لسەر وان بنەمایان پارتی دیموکراتی کوردستان وەک درێژەپێدەر و بەردەوامی دان ب رێبازا بارزانی نەمر و زێدەتر ل ھەر لایەنەکی داکۆکیێ لسەر ئەنجامدانا راپرسیا سەرخۆبوونا کوردستانێ دکەت و لسەر ئاستێ جیھانێ ژی ب سیاسەت و دبلۆماسیەتا سەرۆک مەسعوود بارزانی تا رادەیەکێ زۆر پشتەڤانیی بۆ سەرخۆبوونا کوردستانێ درۆست کریە . ئەڤەژی وێ چەندێ دگەھینیت کو ١٦ ێ تەباخێ ئانکۆ دامەزراندنا پارتی دیموکراتی کوردستان بەرسڤ و ئۆمێد و بناغێ سەرخۆبوونا کوردستانێ بوو .
